pisortanngortoq
Aatsitassanut Naalakkersuisoqarfik nutaamik pisortaqalerpoq
Naalakkersuisoqarfimmut pisortassatut pingasut qinnuteqareersut, kina pisortatut atorfinitsinneqassanersoq aalajangiunneqarpoq
Naalakkersuisut aalajangerput Jørgen T. Hammeken-Holm Aatsitassanut Naalakkersuisoqarfimmi pisortatut atorfinitsinneqassasoq pingasunngormat. Jørgen T. Hammeken-Holm Aatsitassanut Naalakkersuisoqarfimmi pisortatut sulilerpoq ullumi sisamanngornermi.
Jørgen T. Hammeken-Holm piffissami sivisuumi Namminersorlutik Oqartussani sulisarsimavoq, tassunga ilanngullugu aatsitassanut tunngassuteqartut iluini pisortatut atorfiit arlallit suliffigisimavai. Jørgen T. Hammeken-Holm piffissami kingullermi Aatsitassanut Naalakkersuisoqarfimmi pisortaagallartutut atorfeqartinneqarpoq.
Suleqatigiilluarneq
- Jørgen T. Hammeken-Holmimik maannamut suleqateqarsimanera naammagisimaarluinnarpara. Jørgen T. Hammeken-Holm aatsitassanut tunngassuteqartut iluini ilisimasaqarluartuullunilu misilittagaqqortuujuvoq. Siunissami suleqatigiilluarnissatsinnut qilanaarpunga, aatsitassarsiornermut naalakkersuisoq Anda Uldum tusagassiutinut nalunaarummi oqarpoq.
Pisortatut qinnuteqartut pingasuupput.