naalakkersuisunngorlaaq
Aatsitassanik suliassaqarfik eqaanninngortinneqassaaq
Ukiuni marlussunni Inatsisartut Aatsitassat pillugit ataatsimiittialiaanni ilaasortaareerluni Múte Bourup Egede, IA, suliassaqarfik politikkikkut akisussaaffigilerpaa. Taanna partiimini ilaasortat sinnerattut uranip piiarneqarnissaanut akerliusorujussuuvoq, kisianni GME-mi suliniutit naapertuilluartumik suliarineqassasut aalajangiusimavaa
Aatsitassat pillugit Naalakkersuisoqarfimmi suliassanik suliarinnittarnerit pisariillisarneqarnissaannik neriorsuilluni Inatsisartuni ilaasortap ilisimaneqarpianngitsup Múte Bourup Egedep, IA, ataasinngormat suliassaqarfimmi politikkikkut aqutsineq tiguaa.
- Aatsitassat pillugit Naalakkersuisoqarfimmiut sulilluarput aamma maani nunami inuppassuartulli allatut isumaqarpunga sulineq sukkanerulaarsinnaagaluartoq eqaannerullunilu. Aamma ajornanngiffiini suliat pitsanngorsaaffigeqataarusullugillu sukkanerusumik suliarineqartarnissaannut peqataarusuppunga, Múte Bourup Egede, Inatsisartut Aatsitassat pillugit ataatsimiititaliaanni ukiuni kingullerni marlussunni siulittaasup tulliatut ineriartornermik malinnaasimasoq oqarpoq.
Assit takukkit: Naalakkersuisut ivertinneqarneri
Tanbreezimut suliniummut aaqqiissummik nassaarniartoq
Taassuma Qeqertarsuatsiaat eqqaani rubinisiorfik ingammik neriuuteqarfigaa aamma Kangerlussuuarmi anorthosit-imik suliniutip qanittukkut aallartinnissaa qilanaaraa. Aamma Kalaalit Nunaata Avannaarsuani Citornenfjordimi nikkelimik aqerlumillu suliniut neriuuteqarfigisorujussuuaa.
Qaqortup timaani Tanbreez-imik suliniutip ukiuni arlalinni uninngasimasup qanittukkut aaqqiissuteqarfigineqarnissaa aamma pingaarnersiorusuppaa.
Atuaruk: D aamma A anereerlutik: Siumut ilumini ajornartorsiorluni akerleriiffiuvoq
Uranimut apeqqut
- Kujataani ineriartorneq pillugu suaartartut ilagisimavaannga. Ajornartorsiummik suli iluamik paasinniluanngilanga, kisianni suliassaq iluamik iserfigissavara taava piffissami qaninnerpaami ingerlaqqissajunnarsivugut, Naalakkersuisunut ilaasortanngoqqammersoq neriorsuivoq.
IA-kkormiutulli Múte Bourup Egede tunngaviusumik Kalaallti Nunaanni aatsitassanik suliniutinut akerliunerpaat ilagaat, tassalu Kuannersuarni Greenland Minerals and Energyp aatsitassanik qaqutigoortunik uranimillu suliniutaanut. Illua´tungaaniittorli taanna pillugu Aatsitassat pillugit politikkikkut akisussaaffeqalersoq oqartikkuminaappoq.
- Qinnuteqaatip suli nassiunneqarsimannginnera isummerfigeqqavara, taamaattumik tassa taannaavoq akissutigisinnaasara. Naalakkersuisoqatigiinni uran pillugu isumaqatigiinnginniarluta isumaqatigiissimavugut. Aamma aatsitassat uranimik akoqarnerpaaffissaannik inissiinissamik siunnersuummik saqqummiussaqarniarluta isumaqatigiissimavugut. Tamanna Naalakkersuisoqatigiinni killiffigaarput, Múte Bourup Egede oqarpoq.
Atuaruk: Naalakkersuisunut ilaasortat nutaat aajuku
Allaaserisaq tamaat AG-mi sapaatip-akunnerani saqqummertumi atuaruk, ullumi pisiniarfinni pisiarineqarsinnaalerpoq. Aviisi uani aamma pisiarinissaanut periarfissaqarputit: