Aatsitassanik saqqummersitsinermi kalaallit peqataasut aatsaat taama amerlatigisut

Aatsitassanik soqutigisaqaqatigiit - The Arctic CLuster of Raw Materials (ACRM) – Kalaallit Nunaani Sulisitsisut Peqatigiit (GA) suleqatigiillutik ukioq manna kingumut nunarsuarmi aatsitassat pillugit nunarsuarmi tamani saqqummersitsivik annersamut PDAC Torontomi ingerlanneqartussami peqataaqqissapput.
Nunatsinni inuussutissarsiortunit nunanut allanut aallartitat aatsaat taama amerlatigipput, GA paasissutissiivoq.
Suliffeqarfiit 40-t sinnerlugit amerlatigisunit inuit 90-init amerlanerit pisoqartitsinerni peqataassapput, ataatsimeersuarnertaqassaaq aammalu saqqummersitsisoqassalluni. Aallartitanit peqataasussanut immikkut pisoqartitsinernik ingerlatsinerni peqataatinneqassapputtaaq, ilaatigut aatsitassaqarfimmi ingerlatsiviusumut takornariartinneqassallutik, ilaatigut qaqqa iluanut aammalu qaqqami aatsitassaqarfik aammaannartumik taaneqartartumik takornariassallutik.
Pisoqartitsinissani pingaarnertut pisussat eqqaaneqarsinnaasut ilagaat:
Arfinngornermi 1. marts: ”Inuussutissarsiornermik ingerlatsisut nunap iluanukassapput”-mik GA-p pisussaq taaguuserpaa, tamatumani pissanganartumik alakkagassaq ingerlanneqassammat, tassalu canadamiut aatsitassaqarnermik ingerlatsiviat illoqarfik Sudbury peqataasunit 70-iusunit tikeraarneqassammat.
Sapaatiuppat 2. marts GA aamma ACRM ”Greenland Business Event” ingerlatissavaat ilassinnillunilu aggersaaneq inunnut 200-t sinnerlugit amerlassuseqartunut ingerlanneqassaaq, peqataasussallu nunuarsuarmi tamaneersunit aggersuussapput. Attaveqatiginnittut akornani qaammatialuit matuma siorna GA-p Kinami tikeraarneranit attaveqatigineqartuneersuupput.
Ataasinngorneq 3. marts Inuussutissarsiornermik, Aatsitassaqarnermik aammalu Suliffissaqartitsinermik Pisortaqarfimmit aallartitat Greenland Day-imi peqataassapput, pisoqartitsinermi kalaallit akuersissummik peqartut arlallit suliniutit pillugit nutaarsiassanik aammalu suliniutit pillugit nassuiaatinik saqqummiissapput, kiisalu suliniutinut nutaanut aningaasaliisussanik pilerisaarinissat ingerlanneqassallutik.
Marlunngorneq 4. marts Toronto Stock Exchange pulaarneqassaaq.

Attaveqaqatigiinneq
– Sulianut ilisimasalinnik arlariinnik naapeqateqassaagut nunarsuarmi tamani nunat inissisimaneri pillugit nunallu imminnut qanoq sunneqatigiinneri pillugit politikkikkut inissisimanerinut tunngasuni ilisimasallit, aningaasaqarnikkut, inatsisitigut inissisimanerillu pillugit ilisimasallit naapeqatigineqassapput, Ellen Arnskjold GA-meersoq oqaluttuarpoq.
– Tamatuma saniatigut aammattaaq aatsitassarsiornermik ingerlatsiviit aningsoorsuit aammalu pilersuisui naapeqatiginissaanut periarfissaqassaagut. Pisussat LEARNING TOUR-imik taasimavarput (ilinniagaqarfeqarluni angalaneq), isumaqarattami ilikkarneqarsinnaasut sapinngisamik tamaviisa ilinniarfigisariaqarlugit.
– Ataatsimeersuarnermut ilutigitillugit pisoqartitsinerit arlariit ingerlanneqassapput, piffissaqarnerlu soqutigisallu aallaavigalugit pulaarneqarsinnaassapput. Siullertulli attaveqaqatigiinnissamut periarfissat atorneqarnissaat uani pineqarput. Ilisarisimasassaqqissunik ilaatigut attaveqaqateqarnissat aammali ilisarisimaleriikkanik attaveqaqatigiinnerit annertusarnissaanut pisoqartitsivik atorneqassaaq.
– Allatut oqaatigalugu ilisarnaatinik avitseqatigiinnerit aammalu Kalaallit Nunaata periarfissai pillugit ilisarititsinerit ingerlanneqassapput – minnerunngitsumik kalaallit pilersuisinnaasut suliassanik ingerlatsivinnik pineqartuni misissueqqissaarnerup nalaani aammali aatsitassanik piiaalernerup nalaani pilersuisinnaasunik suliassanillu kivitsisinnaasunik ilisarititsinerit ingerlanneqassapput.
– Neriuutigaarput aallartitat amerlassusai eqqarsaatigalugit oqaluttuarisaanermi aatsaat taama amerlatigisut peqataanerisigut aammalu ingerlatassat patajaalluinnartumik suliat Kalaallit Nunaata soqutiginassuseqaannarnissaa qulakkeerinniffigisinnaassallugu, tamatumani misissueqqissaarnissani aammalu aatsitassanik ingerlatsiviit soqutiginninnerinik ikummarissaasinnaassalluta, Ellen Arnskjold naqissusiivoq. – Pisariaqartinneqarput aningaasaliisinnaassuseqartut, suliniutit nutaat aallarnisarneqarnissaat pilerniassammat aammalumi suliniutit ingerlanneqareersut suliassat ingerlannerini alloriarnerit tullii aallarnerneqarnissaat pisariaqartinneqarpoq – immaqalumi suleqatigiinnerit nutaat pilersinneqarsinnaallutik.
Angalaneq peqataasunit namminersortuniinnavik aningaasalerneqarpoq.