aatsitassarsiorneq

Aatsissanik suliffissuaqarnermi ataqatigiiaat aarlerinartorsiortitaasut

Suliffeqarfeeqqat aatsitassaqarfinnik nutaanik ujaasisut nunatsinni nungulerput

Anders Lie misissuisoq

Siullermik pingasuunngikkunik sisamaagaluarput, maannalu ataasiinnaalluni ungasinngitsukkullu suerutissagunarluni. Aatsitassarsioqatigiiffeeqqat aatsitassaqarneranik misissueqqissaarnermut siusissorujussuakkut akuulersartut tamatumani pineqarput.

Taakkua iluamik oqaatigalugu tassaapput, kuulteqarfimmik suli nassaarineqanngitsumik ujaasisartut.

Taakkualu tammakarluinnarpata tamanna siunissami aatsitassarsiornissamut ilungersunarluinnartunngorsinnaavoq.

Amiakkutaq
21st North aatsitassarsioqatigiiffeeqqat tamakkua amiakkutuarilerpaat.

- Aatsitassarsioqatigiiffeeqqat Danmarkimeersut Kalaallit Nunaanneersullu aatsitassaqarfinnik nutaanik aaqqissuussaasumik ujaasisut ukiut marluinnaat matuma siornatigut arlaliupput. Maanna kisiartaalluta amiakkuulersimagunarpugut, Anders Lie 21st Northimeersoq oqarpoq.

Siusissukkut misissueqqissaarisoqanngitsoq
Anders Lie naliliivoq 21st Northip aamma Kalaallit Nunaanni oqaluttuaannanngornissaanut piffissaq apeqqutaaginnartoq. Tassami aatsitassat akii aaqqikkiartuleraluartut aningaasat suli imaaliallaannaq pissarsiassaanngillat.

- Aningaaseriviit aatsitassarsioqatigiiffeeqqanut aningaasaliinissamut suli tunuarsimaarput. Aatsitassat akii ukiup ataatsip missaani qaffakkiartuaarusaarsimagaluarput, kisianni soorluuna akit qaffakkiartuaarnerisa ataavartunngornissaat utaqqimaaraat, oqarpoq.

Atuaruk: Hudson: - Suliarput tulluusimaarutigaarput

Taamaattumik Anders Liep ernummatigaa, Kalaallit Nunaanni aatsitassaqarfinnik nutaanik ungasinngitsikkut ujaasisoqarunnaarnissaa.

- Ukiualuit qaangiuppata ujaasisoqarunnaarnissaanut aarlerinaateqartoq ilimagaara. Tamanna ilungersunartunik kinguneqassaaq, ataqatigiiaat taamaalillutik oqaluttuaannanngussammata. Taamaalilluni aamma aatsitassaqarneranik misissueqqissaarinermik suliniutinik nutaanik, aatsitassarsiornermi suliniutitut ilimanaatilittut ineriartorsinnaasunik, ukiorpanni pilersoqarnaviannginnera aarlerinaateqarpoq, oqarpoq.

Suliaq pillugu AG-mi nutaami atuaqqigit:

Powered by Labrador CMS