Aasiannut immap naqqatigut kabeleqalersitserusuttoq

- Kapelersuaq immap naqqatigoortoq qaqugu Aasiannut apuutissava atuutilissavalu?

Inatsisartunut ilaasortaq, Peter Olsen (IA), paragraf 37 naapertorlugu Naalakkersuisunut taama apeqquteqarpoq.

Nunatsinni innuttaaasut sumiluunniit najugaqaraluarunik assigiimmik internetimut akiliisarnissaat, taassuma kissaatigaa.

Atuaruk: Diskomut immap naqqatigut kabeleqalissanngikkallarpoq

Atugassat assigiit
- Nuummi Qaqortumilu kisimi 500 gb tikillugu atuisoqarsinnaavoq. Taannalu ‘taamaallaat’ qaammammut 1099 koruuneqarpoq. Illoqarfiit sinnerini annerni taamaallaat annerpaamik 50 gb-mik pisisoqarsinnaalluni. Taannalu qaammammut 1149 koruuninik akeqarpoq, Peter Olsen apeqquteqarnermini ilaatigut taama allappoq.

Taassuma saniatigut apeqqutigaa, Upernavimmiut, Qaanaarmiut, Tasiilarmiut, Illoqqortoormiormiullu sukkanerusumik pitsaanerusumik siunissami interneteqalissanersut.

Namminersortunngorsaaneq aqqutissaanngitsoq
Tele Greenlandip namminersortunngorsarneqarnissaanut Peter Olsen politikerini unitsitseqataasut ilagaat, Nuup avataaniittut attaveqaatit tungaasigut ajornerusumik inissisimalersinneqarnissaannik kinguneqassasoq partii isumaqarmat.

- Tele-Postip namminersortunngorsarneqarnissaanik unitsitseqataavugut isumaqaratta upperalugulu kalaallit inuiaqatigiit ataatsimoornitsigut kivitseqatigiinnitsigut akileeqatigiinnitsigullu sineriassuarmi sumiikkaluaruttaluunniit attaveqaateqarnerup tungaatigut sukkut tamatigut naligiinnerusumik atugassaqartinneqalernissarput; sumiikkaluaruttaluunniit ullumikkuminngarniit attaveqaatigut sukkanerullutillu pitsaanerullutillu akikinnerulersinneqassasut, Peter Olsen allappoq.