Aasiannut imaatigut kabeli pillugu isumaqatigiissut maanna atsiorneqarpoq

Sisamanngornermi Tele-Postip suliffeqarfimmik Nokiamit pigineqartumik Alcatel-Lucent Submarine Networksimik isumaqatigiissut atsiorpaa, taanna Nuummiit Maniitsoq aamma Sisimiut aqqusaarlugit suliffeqarfiup imaatigut kabelimik sanaartorlunilu pilersitsinissamik akisussaassaaq.

Atuaruk: Immakkut attaveqqaat avannamut ilaneqalerpoq

Periarfissat arlallit
- Inuussutissarsiorneq siuariartornissanut amerlanernik periarfissaqalissaaq, piginnaasallu annertuninngorneratigut ilinniagaqarnerit peqqinnissaqarfillu piginnaanngorsarnertigut qaffassaaffigissavai. Ineriartornerup pitsaasumik sunniuteqaqataaffigisinnaanera assut nuannaarutigaara, siulersuisuni siulittaasoq Stine Bosse oqaluttuarpoq.

Aaqqiissut tatiginartoq
Imaatigut kabelip saniatigut Aasianniit Qasigiannguanut aammalu Ilulissanut sakkortusaavimmik annertuumik piginnaasalimmik pilersitsinissaq kiisalu Uummannamiit Upernavimmut sakkortusaaviup maannakkut pioreersup tallineqarnissaa aammattaaq pilersaarutaavoq.

Pilersaarut tamarmi taaguuteqarpoq ’Kitaata Avannaani suliassaq’-mik, tamannalu nunatta avannarpasissortaani innuttaasunut 20.000-inut nalunaarasuartaatitigut attaveqaqatigiinnermik pitsanngortitsissaaq.

Ilisimasaqarluartoq
Kitaata Avannaani suliassamut siullermut Alcatel-Lucent Submarine Networksip ilisimasaqarluarnera pissutigalugu sullissisorinissaa tulluarnerpaasimavoq.

- Suliffeqarfimmik tassannga toqqaasoqarpoq, imaatigut kabelimik ingerlatsinikkut isumannaannerpaamik pitsaanerpaamillu suliaqarsinnaanera pissutigalugu. Isumaqatigiissutip inissilluarneqarnera assut naammagisimaarpara, 2017-imimi pilersitsinissap aallartivinnissaa qilanaarnaqaaq, pisortaaneq Kristian Reinert Davidsen nassuiaavoq.