Nipiaa Rock Festival
Aasianni rockertunik tusarnaartitseqqissaaq
Nipiaa Rock Festival ukiumi ataatsimi unikkallaqqareerluni tusarnaartitsisoqaqqinnissaanut aaqqissuusseqqissaaq
Aasiaat timersortarfianni nipilersortartut 15-it tusarnaartitsissapput Nipiaa Rock Festivaleqarnera, ataasinngornermit arfininngorneq ilanngullugu tusarnaartitsisoqassalluni. Qeqertarsuup Tunuanit aamma Sisimiunit umiatsiamik Aasiannukaassisoqassaaq.
Nipiaa Rock Festivalimi aaqqissuisut ukioq kingulleq aalajangerput ukiumi ataatsimi uninngagallarniarlutik. Aningaasanik assigiinngitsunit tapertereernermi kingorna aaqqissueqqissinnaanngorput.
Tamanut ammasoq
- Inuit 35-50-t qaaqquneqarput. Inersimasunut tallimanngornermi arfininngornermilu tusarnaartitsinissat ernumanartortaqanngillat. Minirockfestivalertoqarnerani takkuttoqassanersoq pissanganassaaq. Ilaqutariit isersinnaanissaat neriuutigalugu aningaasaliisunut isumaqatiginninniarnikuuvugut isissutissat akikinninngortinniarlugit, aaqqissuinermi siulittaasoq Peter Olsen Sermitsiaq.AG-mut oqarpoq.
Klovneqassaaq, quiasaarisoqassaaq, qilaatersortoqassaaq torlorsortartoqassaaq aliikkusersuisoqassallunilu. Hinnarik Nuummit tikissaaq Piitannguaq Alaufesen Ilulissanit aamma tikissalluni. Pamyua Alaskamit aamma tusarnaartitsissapput.
Nipilersortartut nuannarineqartut
Kimmernaq Kjeldsen, Nanook, Small Time Giants, Inuit Feet, Jenseeraq aamma Siissisoq Nipiaa Rock Festivalimi tusarnaartitsissapput, tallimanngornermi arfininngornermiluunnit tusarnaartitsissallutik.
Namminersorlutik Oqartussat, Qaasuitsup Kommunia, Napa aamma Gramex pisussamut aningaasanik tapersersuisuipput. Illoqarfimmi aamma suliffeqarfiit tapersersuipput, taamaasilluni aaqqissuisut 600.000 koruunit aaqqissuinermut atussallugit.