Aasiaat
Aasianni pisariaqartinneqartumik asfalterineq
Aasianni asfalterisoqannginnerani asfalterinissamut atortussat angallanneqaqattaartut
Aasianni asfalterinissamut ujaraaqqat Aasiannit Ilulissaliaanneqaqqaartarput. Asfalterineq sisamanngormat aallartippoq. Kilometerimi ataatsimi asfalterisoqassaaq.
Aasianni aqquserngit putoqartiterput. Taamaattumik pisariaqartinneqartumik asfalterisoqarluni. Aasianni asfalterinissamut Qaasuitsup Kommunia 650 tonsit asfalterutissanut aningaasaliissuteqarpoq.
- Ujaraaqqat Aasiannit Ilulissaliaanneqarput. Ujaraaqqat Ilulissani asfalterutissamut akulerunneqarput, umiarsuaq Holmi atorlugu Aasiannukartinneqaqqillutik. Marloriarluni ujaraaqqanik angallassisoqassaaq, Qaasuitsup Kommuniani teknikkeqarfimmit Aasianniittumit Otto Sandgreen oqarpoq.
Asfalterinerit sisamanngornermi unnuaqeqqanut aallartinneqarmat Frederik Lyngep Aqqutaa, Aqqusinersuaq Sannerut matuneqarput.
Sapaatiuppat asfalterisoqaqqissaaq, Koorunnguaq aamma Sissakkooriaq matuneqassallutik marlunngorpat tungaanut.
Illoqarfiup assinga kiisalu assi ataaseq takuneqarsinnaapput