neriuuteqartut

Aasianni namminersortuni suliffissaasinnaasut 50-it

Sulineq ukioq tamaat agguataarneqarneratigut Aasianni sulisussaaleqisarneq aaqqiivigisinnaassallugu, Polar Raajat neriuuteqarput

Aasianni aappaagumut aalisakkanik assigiinngitsunik aalisartoqarsinnaanissaanut neriuuteqarluartoqarpoq. Tamanna avannaani illoqarfimmi namminersortunit 50-it tungaanut suliffissanik pilersitsisoqarneranik kinguneqarsinnaavoq.

Ulluni qulini misileraalluni saarullinnik Aasianni tunisassiortoqarnera iluatsilluarpoq, tunisassiorfiullu Polar Raajap saarulliit nerpiinik tunisassiorneq ataavartumik ingerlassinnaanngorpaat.

Saarulliit ukiut nutaap tungaanut
Namminersorlutik Oqartussat misiliilluni saarullinnik aalisarnissamut pisassiissutinik agguaanerisa kingorna tamanna pivoq.

Sermitsiaq.AG-p Polar Raajanin pisortaq, Henrik Eriksen, tamanna pillugu oqaloqatigaat.

- Apriiliminnganniit ukiup naanissaata tungaanut aalisakkanik allanik Aasianni tunisassiornitta saniatigut saarulliit tunisassiarisinnaanngorpagut. Siusinnerusukkut aallartikkusussimagaluarpugut, kisianni misileraalluni aalisarnissamut pisassiissutit kingusissukkut aatsaat pissarsiaraagut, sukkanerpaamik aallartissinnaanera malillugu aallartippugut.

Suliffiit qassit maannakkut pilersissallusigit naatsorsuutigaasiuk?

- Siumut isigigaanni, aalisariutit inisseriarpata aammalu pisassinneqassagutta - pilersuineq tamarmi inisseriarpat - taava Aasianni suliffissanut 50-inik aallaavissaqarpoq.

- Saarulliit nerpiinik misiliummik tunisassiorneq aallartikkatsigu illoqarfimmi suliffissaaleqisoqarunnaarnera misigivarput. 2007-mili tunisassiorfik tigoqqaaratsigu eqqaamasara naapertorlugu illoqarfimmi suliffissaaleqisut 200-t missaaniipput, taamaammat ineriartorneq pitsaasuuvoq, Henrik Eriksen oqarpoq.

Sulisussanik naammattunik pissarsisinnaavisi?

- Aap, kisianni ajornartorsiutaavoq. Sinerissaminngaanniillu inunnik ujartuisariaqartassagunarpugut, maani tunisassiorfimmi ineriartorneq tamaanga unitsikkusunnginnatsigu, Polar Raajat pisortaa oqarpoq, taanna Polar Seafoodimit Nunatsinni suliffeqarfinni namminersortut annersaannit pigineqarpoq.

Tunisassiorfiup allanngornera akisooq
Aasianni tunisassiorfiup ukioq manna allanngorlugu suliarineqarnera 15 millionit koruuninik akeqareerpoq, allanngornerata saarulliit aamma qalerallit tunisissiarisinnaanissaanut piareersippaa, saniatigullu raajanik tunisisut, nipisap suaat aammalu saattuallu suliarineqarsinnaallutik.

Qeqertarsuup Tunuani saattuartassat affaat Polar Raajat siunissami tunisassiarisalernissaat naatsorsuutigaat, taakku maanna 600 tonsiupput.

Ataavartumik ingerlatsineq neriuutigaat
Aasianni siunissami iluatsitsilluartoqassappat, assigiinngitsunik tunisassiorneq ukioq naallugu ingerlanneqarnissaa pingaartuusoq, Henrik Eriksen oqarpoq.

- Saarullinnik pissarsiaqarunnaarutta, taava qaleralinniassaagut, taama iliornikkut ingerlatsineq ataavartumut tulluassaaq aammalu ukioq naallugu sulisitsinissap qulakkeerneqarnissaa qanillissaaq.

Powered by Labrador CMS