Aasiaat
Aasianni kulturikkut illorsuartaarnissamik takorluukkat
Ukiut marluk affaatalu matuma siorna Aasianni timersortarfiup siulersuisuisa Peter Olsen siuttoralugu aalaajangiisoqarpoq, kingusinnerusukkut Qaasuitsup Kommuniani kommunalbestyrelsimit oqaluuserineqartumik
Aallarniisut suliniummut siunnersuuteqarput, tamannalu Aasiammiorpassuarnut takorluukkatut oqaatigineqarsinnaavoq. Suliniummi kulturikkut illorsuarmik sanaartornissamut aallartisarneruvoq, ingerlanneqarneratalu immikkoortua siulleq pingaarutilik angusiffiuvoq, tassa Qaasuitsup Kommuniata sananeqarnissaanut aningaasaliissuteqarnissaq akueralugu atsiormagu.
Illoqarfimmut iluaqutissaq
Peter Olsenip aamma timersortarfiup siulersuisui isumaqarput, kulturikkut illorsuaq aaqqiissutissaq pitsaasuussasoq. Illoqarfik nuannernerulersissavaa, assigiinngitsunillu sammisaqartitsiffiusassalluni. Aammattaaq illoqarfimmi najugaqartut pitsaasumik iluaqutsissavai, tamatuma saniatigut illoqarfimmi nutaaliorfiussalluni.
Tunngavilersuutillu ilagaat, kinguaariinni inuusunnerusut timersornerinnaanngitsumik sumiiffissamik amigaateqarnerat.
Suliniummut aallarnisaasunut ilaasortaasimasoq Shariar Bordbar aamma oqaaseqaateqarpoq.
- Illorsuaq soorunami innuttaasunut tamanut atugassiaassaaq, kisianni aamma meeqqanut inuusuttunullu sammitinneqassaaq, biografilu illoqarfimmut tamarmut iluaqutaassaaq.
Taassuma toqqavia Aasianni timersortarfiup affaanit minnerulaarpoq.
Titartagartaani takuneqarsinnaavoq illorsuup kangiatungaa quleriinnut pingasunut avinneqarsimasoq, qulaaninngaanniillu isigalugu timersortarfiup affaanit minnerulaartoq takuneqarsinnaalluni.
Masantip Ilulissaniittup titartagaani biografertarfiup angissusaa isiaviit Katuami aamma Sermermiuni amerlassusaannut sanilliukkaanni, tassani 126-nik issiaveqarpoq, Katuami 500-t, Sermermiunilu 250-t.
- Katillugu 1485 kvadratmeterit internetcaféqassapput, ataatsimiittarfik, allaffik, ini peqatigiiffinnut attartorneqarsinnaasoq, cafélu nalinginnaasoq saqqummersitsinissamut inissaqartoq. Tamakku saniatigut isiginnaartitsillutillu tusarnaartitsisinnaassapput, Peter Olsen neriulluarluni oqaluttuarpoq.
Piffissap ingerlanera
Saqqummiussaq Qaasuitsup Kommuniani siullermeerluni suilarineqarnerata kingorna, suliat allat assigalugit Qaasuitsumi allaffissornikkut ingerlanneqaqqaassaaq.
Ulloq 22. oktober 2014 - Suliniut Qaasuitsup Kommuniani bestyrelsimut saqqummiunneqarpoq.
Ulloq 11. maj 2015 - Sanaartornermut avatangiisinullu ataatsimiititaliap titartarneqarneranut tapiissutinut qinnuteqaat 130.000 koruuninut akueraat, aamma sananeqarnissaanut 70.000 koruuninut qinnuteqaat.
2015-imi novembarip naalernerani - Masanti Ilulissat illorsuaq titartarpaa, illorsuarlu 52 millionit koruuninik akeqassasoq naatsorsuutigaat.
2016-imi novembarip 30-anni - Kommunalbestyrelsip suliniut akuersissutigalugu atsiorpoq, sananeqarnissaanullu 15 millionit koruuninik aningaasaliisoqassasoq.
Qitiusumik inissisimasoq
Illorsuup titartarneqarnera illoqarfiup qeqqani inissisimavoq, Aasianni timersotarfiup eqqannguani. Inimut ammasumut iseraanni, inuit eqqumiitsulianik saqqummersitsineq takusinnaassavaat.
Ingerlateqqinnissaanut aningaasanik ujaasisoqassaaq. Suleqatigiissitat aningaasat pisariaqartinneqartut pissarsiarippatigit, sanaartornissamut titartaasoqassaaq, kingornalu suliniut suliarinnittussarsiorneqassaaq, suliffeqarfiit assigiinngitsut neqerooruteqarsinnaaniassammata.
- Suliniut 2018-imi aallartissinnaagutsigu, illu ukioq ataatsip affaa imaluunniit marluk qaangiuppata piareersinnaanera naatsorsuutigaarput. Ukioq ataaseq qaangiutsinnagu aningaasat pissarsiarinissaat anguniarparput, ilungersorlunilu sulisoqartariaqarpoq, kisianni naammassisinnaagipput ilimagaara, Shariar Bordbar oqarpoq, taanna suliniummi suleqatigiinnut ilaasortaasimavoq.
Titartarneqarnera
Maluginiarlugu isiginnittut malugisinnaavaat, cafép initaa oqaatigineqartutut aqqusernup nalaaniinngitsoq. Kisianni tamatumunnga Peter Olsen nassuiaatissaqarpoq.
- Assimi takuneqarsinnaasoq illoqarfimmi sumiiffimmut allamut titartagaagaluarpoq. Imaanngilaq titartagaq sanaartornissamut inerniliussaasoq. Illorsuup piareeruni qanoq isikkoqarsinnaaneranut takusassiaavoq. Taanna suli iluarsagassaavoq, maannalu toqqavissaanut tulluarsagassaalluni.
- Café soorunami aqqusernup nalaaniissaaq, tamannalu pilersaarutaajuaannarsimasoq neriorsuutigissavara. Inuit soorunami majuartarfikkooqqaaratik imaluunniit elevatorikkooqqaaratik isersinnaasariaqassapput, Peter Olsen nassuiaavoq.