nunatsinnit

Aasianni ikuallannersuaq unitsinneqarpoq

Napparsimasut akunnittarfianni ikuallaffimmi suli ikumasoqalaarpoq

Qatserisartut ikuallattoq qatserpaat

Aasianni napparsimasut akunnittarfianni arfininngormat unnukkut nalunaaqutaq 21 missaaniilli annertuumik ikuallanneq sapaatiummat ullaassakkut nalunaaqutaq 05.30-p missaani siaruaakkiartorunnaartinneqarpoq.

Aasianni napparsimasut akunnittarfiat arfininngormat unnukkut nalunaaqutaq 21 missaanni ikuallalerpoq.

Napparsimasut qulit sulisullu 31-it napparsimmavimmit qimagussortinneqarput, napparsimasut akunnittarfiannit pujuliornerujussuaq pissutigalugu.

Ikuallannermi ikuallaffiup eqqaa tamarmi pujuliorfiusorujussuuvoq, napparsimmaviullu eqqaani innaallagiaq qaminneqarpoq.

Akunnerpassuarni tulliuttuni qatserisartut tamaviaaerlutik ikuallattoq qaminniarsaraat siuaruatsaaliorlugulu.

Ikuallanneq sapaammi nalunaaqutaq 5.30-p missaani siaruaakkiartorunnaartinneqarpoq, ikuallaffimmili suli ikumasoqalaarpoq.

Ikuallannermut pissutaasoq misissorneqassaaq

Ulluni aggersuni sukumiinerusumik misissorneqassaaq ikuallannermut suna pissutaanersoq.

Politiit maannangaaq oqaatigisinnaanngilaat ikuallannermut atatillugu ajoqusertoqarsimanersoq.

Nalunaarutigineqarpoq napparsimmavimmi napparsimasut sulisullu ajunngitsut.

Ikuallannerup ajoqusigai qanoq annertutiginersut maannangaaq qulaajarneqarsinnaanngilaq, ikuallannerullu kingorna annertuumik saliisoqassaaq.

Ikuallaffiullu eqqaa qanittukkut innaallagialeqqinneqassaaq. Politiit ikuallanneq pillugu maannangaaq annertunerusumik paasissutissiisinnaanngillat, naatsorsuutigaluguli ikuallannerup qanoq pilersimanera sukumiinerusumik misissorneqareerpat qulaajarneqareerpallu, annertunerusumik paasissutissiisinnaassallutik.

Powered by Labrador CMS