ilinniagaqarneq

Aasianni GUX-imi rektori nutaaq

– Avannaani inuusuttunut ilinniartitaanermi neqeroorutit inerisassavagut pitsanngorsarlugillu, Aasianni ilinniarnertuunngorniarfimmi rektorinngortoq Otto Simonsen oqarpoq

Otto Simonsen, rektor, GUX, Aasiaat
Otto Simonsenip Aasianni atorfittaaminut ikkunnissani qilanaaraa

Namminersorlutik Oqartussat ilinniartitaanermi politikkimi anguniagaasa anguneqarnissaannut tapersiinissannut qilanaarpunga, Aasianni Avannaani Ilinniarnertuunngorniarfimmi rektorinngortussaq Otto Simonsen oqarpoq, taannalu 2015-imi aggustip aallaqqaataani atorfimminut ikkutissaaq. Taamatut namminersorlutik oqartussat tusagassiorfinnut nalunaarutikkut paasissutissiipput.

– Aasianni ilinniarnertuunngorniarfimmi rektoritut atorfik uannut neqeroorutigineqarmat nuannaaqaanga tanngassimaaqalungalu. Namminersorlutik Oqartussat ilinniartitaanermi politikkimi anguniagaasa anguneqarnissaannut tapersiinissannut qilanaarpunga, pingaartumik ilinniarnertuunngorniarfimmi sulisorpassuit suleqatiginissaat qilanaaraara, taakkoqanngippammi anguniakkat anguneqarsinnaanngimmata. Avannaani inuusuttunut ilinniartitaanermi neqeroorutit inerisarsinnaavagut pitsanngorsarlugillu, taamaalillutalu piffissaq sivisunerusoq eqqarsaatigalugu nunap ineriartortinneqarnissaa pitsanngorsaaqataaffigisinnaallutigu, namminersorlutik oqartussanit tusagassiorfinnut nalunaarut malillugu Otto Simonsen oqarpoq.

Otto Simonsen 58-inik ukioqarpoq aammalu inuiaqatigiilerinermi oqaluttuarisaanermilu cand.mag.-iulluni.

Otto Simonsen Aalborg Universitetimi Det Samfundsvidenskabelige Fakultet-imi allaffeqarfimmi pisortaavoq. Ilinniartitsinermik ilaatigullu Danmarkimi Undervisningsministeriaqarfimmi ingerlatsisutut, isumaqatigiinniartarnermut immikkoortortaqarfimmi allaffimmi pisortatut Nordjyllands Amt-imilu sulinermigut misilittagaqarluarpoq, kingullertut taaneqartumi inuusuttunik inersimasunillu ilinniartitsinermi akisussaanikuulluni, tassunga ilanngullugit ilinniarnertuunngorniarfiit, tusagassiorfinnut nalunaarummi allassimavoq.

Otto Simonsen Løgstørimi inunngorpoq aammalu nulianilu pingasunik meeraqarlutik.

Powered by Labrador CMS