nuan
Aasianni Arnanut arpanneq iluatsilluarpoq
Arfininngormat Aasianni Arnanut arpannermik taallugu arpatsitsinermi 101-it peqataapput kræftelu akiorniarlugu suliniaqatigiiffimmut Neriuffimmut katersuiniartoqarluni
Ukiarpalaaq pueqqulaaraluarluni seqinnertoq arfininngormat Arnanut arpannermut nuannersaataaginnarpoq. 5 kilometerimut arpattoqarpoq aammalu 2 kilometerimut nukingerluni pisuttoqarluni aamma powerwalkingimik taaneqartartumik.
Sisoraatinik oqilaniuttartoq Pipaluk Kristensen 5 kilometerimut apuuteqqaartuuvoq tullersortigalugu Ajaaja Rosing pingajuuvorlu Dorannguaq E. Nielsen.
Peqataasulli amerlanersaasa qanoq inissinnertik pivallaanngilaat periarfissaq atorlugu arnaqatitik arpannermi pisunnermiluunniit ataatsimuualaaqatigigamikkit.
Arpareernermi imeruersaatissanik Nuuk Imeq imernik tunissuteqarpoq aammalu naatitanik peqataasut pissaannik Pilersuisoq tunissuteqarluni.
Arpanneq kræfti akiorniarlugu suliniaqatigiiffiup Neriuffiup nuna tamakkerlugu illunut naasaalluni katersuiniarnissaa ullormik ataatsimik sioqqullugu pivoq. Tamanna iluatsillugu suliffeqarfiit assigiinngitsut sulisumik peqataanerannut sulisumut ataatsimut 10 kronenik tunissuteqarput Neriuffimmut tunniunneqartunik. Tamanna 6.060 koruuninik pissarsissutaavoq.
Suliffeqarfiit uku tunissuteqarput: Aasiaat VVS, Elektrikerit, ASEK, KJ, Anuni aammalu Aasiaat Olie.