ajunaarnersuaq
Aasiammiut ataatsimoorlutik ikiuupput
Aasianni Kalaallit Røde Korsiata immikkoortoqarfia qimagussortinneqartunut atisanik allanillu pisariaqartitanik katersillutik ulapipput
Kalaallit Røde Korsiata Aasianni immikkoortoqarfia aallartinneqaqqammerpoq. Suliluunniit pilersinneqavinnikuunngilaq.
Taamaakkaluartoq immikkoortoqarfik Uummannap sulluani nunaqarfinni innuttaasut qimagussorneqartut tikisinneqalersut paasinarsimmat, ingerlaannaq ikiuunnissamut piareersarlutik aallartipput.
- Atisanik, igaffimmut atortunik aamma pinngussanik katersivugut, siulittaasoq Agathe Steenholdt Sermitsiaq.AG-mut oqarpoq.
Atisaminernik imaluunniit allanik pisariaqartitanik tuniserusunneq Aasianni annertuvoq. Illoqarfimmiut tamarmik ataatsimut ikiuukkusupput.
Nunaqarfimminnillu qimatsisariaqartunut taakku kialaartitsipput.
- Atisanik aalleraangamik atisat nuannaarutigilluinnarlugit oqaaseqartarput.
- Kisianni aamma Aasiannut taama tikilluaqquneqarluarnertik qujamasuutigalugu ingammik oqaatigisarpaatm Agathe Steenholdt oqarpoq.
Innuttaasut kisimik tapersiinerminnik takutitsinngillat. Suliffeqarfiit aamma tapersiipput. Atisaarniarfik Anuni gavekortinik tunniussivoq, eqqugaasut assersuutigalugu skuunik pisisinnaaniassammata, pisiniarfik aamma alla meeqqanut pinngussanik tunniussivoq.