Monday, June 19, 2017 - 08:01

Aasiaat inuit tikinnissaannut piareersimavoq

Umiarsuaq alapernaarsuut Ejnar Mikkelsen Aasiannut ingerlaarpoq
Assi.: Leiff Josefsen
Qaqqap sisoornissaanut suli aarlerinartoqarpoq, taammaammat Niaqornani Illorsuarnilu innuttaassut qimagussortinneqarput. - Aasiaat inuit tikinnissaannut piareersimavoq, Ane Hansen oqarpoq

Nunaqarfimmi Niaqornani innuttaasut ilarpassui umiarsuarmi alapernaarsuummi Ejnar Mikkelsenimut ilaapput, taakku Aasiannut angallanneqarput.

- Inuit tikinnissaannut piareersimavugut, Ane Hansen Facebookimi quppernermini allappoq.

Aasianni inuit ikiuuttut taassuma nersualaarpai.

- Kommunimi sulisut tamarmik piareersarerlutik inuit tikiunneqartussanut piareerpugut, ullaakkut tikittussat katersorneqarfissaat neriffissaat, inigisassaallu piareerput, taanna oqarpoq.

Ejnar Mikkelsenip Aasiannut tikinnissaa aamma kinguaattoortoq taassuma ilisimatitsissutigaa.

- Sakkutuut umiarsuaat aggersoq kinguaattoorpoq, nal. 13.00 missaani tikissasoq ilimagineqalerpoq, taanna ilisimatitsivoq.

Umiarsuaq alapernaarsuut Vædderen Niaqornanut nakkutilliiaartorluni utissaaq, qaqqap sisooqqinnissaa ernumassutigineqarmat.

Qaqqap malissuarmik pilersitsilluni Nuugaatsiamik eqquisup sisoorfiata eqqaani taanna sisooriaannaq inissisimavoq.

Qaqqamik sisoortoqaqqinnissaanut aarlerinartoqarnerata upalungaarsimasut Illorsuit aamma Niaqornat qimagussortitsiffiginiarlugit unnuaq aalajangerput.

Seneste nyheder / Nutaarsiassat kingulliit