kollegiani erngunneq
Aasiaat: Immiaaraateqaqqussinnginneq atorunnaassaaq
Kollegiani imigassaateqaqqussinnginnermik isornartorsiuilluni ombudsmandip aalangernera Aasianni GUp malinniarpaa
Aasianni GUp kollegiaani imigassaateqaqqusaannginneq januarip aallaqqaataani 2014-mi atorunnaassaaq. Taamaattoq kollegiani imigassartorneq suli inerteqqutaassaaq. Taama pisoqartussanngorpoq Inatsisartut ombudsmandiat nalilileereersoq kollegiani imigassaateqaqqusinnginnermut inatsitigut tunngavissaqanngitsoq.
GU-lli kollegiani imigassaateqaqqussinnginneq atorunnaaraluarpat kollegiani imigassartorneq suli inerteqqutaassasoq, Aasianni GU-mi rektori Flemming Guntofte Nielsen Sermitsiaq.AG-mut ilisimatitsivoq.
Ombudsmandip nammineq suliamik aallartitsinermigut Aasianni kollegiani imigassaateqaqqusinnginneq 2011-p ukiaani aallartittoq misissorpaa. Misissuinermilu inerniliunneqarpoq imigassaateqaqqussinnginnissamut inatsisigut tunngavissaqanngitsoq.
Arlallit anisitaapput
- Ombudsmandi tassaavoq inatsisilernermi Kalaallit Nunaanni qullersaasoq. Soorunami aalajangerneq malissavarput taamalu inerteqquteqarneq januarip aallaqqaataani atorunnaarsissallugu, Flemming Guntofte Nielsen oqarpoq.
Kisianni GUmi ilinniartut ineeqqaminni imigassaateqarsinnaaleraluartut kollegiani erngunneq suli inerteqqutaassaaq.
Aasianni GUp imigassamut inatsisit 2011-mi ukiakkut sukaterpai ilinniartut arlallit erngunnerit kingunerisaannik iniminnit anisitaareereersut. Erngunnerit ilaanni politiit aamma akuliunneqartariaqartarsimapput.
- Inerteqquteqarnerup 2011-mi aallartilaarnerani arfinillit-arfineq marluk ineeqqaminnit anisitaapput. Ukiut qulliuttut aamma ataasiakkaat anisitaarsimapput, Flemming Guntofte Nielsen oqarpoq.
Ilinniartulli ineeqqaminnit anisitaasut ilinniarnerminnit toqqaanartumik anisitaaneq ajorput. Taamaattorli Aasianni nammineq inissarsiortariaqartarput, ineeqqaminniillu anisitaasimagaluit arlallit ilinniarnertuunngorniarnermik naammassinnittarsimapput.