Pyyyh..

Aasanerani agguaqatigiisillugu kiannerusoq

Nunatta annersaani kiassiut aasaanerani gradit marluk sisamallu akornanni kianneruvoq

Aasaanerata pingajorarterutaa maanna ingerlalereerpoq, Nunatsinnilu amerlasuut isumaat naarpertorlugu ajunngitsumik ingerlavoq. Tassami nalinginnaasumit kianneruvoq, DMI.dk ilisimatitsivoq.

Kitaata kujasinnerusortaani illoqarfiit agguaqatigiisinnerani kiatsigiinnangajattoq eqqaassanngikkaani, Nunatta annersaani aasaanerani nalinginnaasumit gradit marluk sisamallu akornanni kianneruvoq.

25 gradingajak
Nuummi juunimi juulip 25-at tikillugu, ullut 18-t kiannerpaagaangami 15°C sinnerlugu kiattarsimavoq. Kiassiut annertusilaarutsigu - tassa 18°C - ullut aqqanilissuit taamatut kalaallit kiassiorput.

Ulloq kiannerpaasoq juulip qulingiluaani qulinganilu uuttortarneqarpoq - ulluni taakkunani 25°C tikingajallugit kiappoq.

Qeqertarsuup Tunuani kiattoq
Ilulissani ulluni aqqaneq-marlunni 15 °C sinnerlugit kiattarsimavoq, ullunilu pingasuni 18°C sinnerlugit kiassimalluni. Tassani kiannerpaagami 19,4°C uuttortarneqarsimavoq.

Kangerlussuarmi Mittarfik sermersuup silaannaaniippoq. Tassanilu ulluni 33-ersuarni 18-niit 23°C-t tikillugit kiattarsimavoq.

Qaammat naanerata tungaanut sila nikeranngitsoq kiattorlu atuutissaaq, DMI nalilliivoq.

Powered by Labrador CMS