Piorsarsimassuseq
Aasaanerani saqqummersitsinermi allagartarsuit nalinginnaanngitsut
Allagartarsuit,Østerbygdenimi qallunaatsiaqarfinnik takutitsisut, sumiiffiup Unescop nunarsuarmiunut kingornussassatut allattorsimaffiutaaniitsilernissaa anguniarlugu Ole Guldagerimit suliarineqarsimasut, Narsami saqqummersinneqarput
Narsap Katersugaasiviani saqqummersitat asseqanngitsut, aasaanera tamakkerlugu septembarip tungaanut takuniarneqarsinnaasussat, tallimanngornermi ammarneqarput.
Saqqummersitani Østerbygdeniusimasup qiterpasissuani qallunaatsiaqarfinnik allagartarsualiat, sumiiffiup 2017-imi Unescop nunarsuarmiunut kingornussarsiat allattorsimaffiutaaniilernissaa siunertaralugu suliarineqarsimasut, takutinneqarput.
Katersugaasiviup pisortaa Jesper Stormly Enevoldsen naapertorlugu allagartarsuit aatsaat siullermeerluni saqqummersinneqarput.
Allagartarsuit katersugaasiviup pisortaanit itsarnisarsiuumillu Ole Guldagerimit Narsarsuarmi katersugaasivimmeersumit suliarineqarsimapput, sumiiffinnilu tallimani, 2017-imi piorsarsimassutsikkut kingornussarsiat allattorsimaffianniilersussatut siunnersuutigineqartuni qallunaatsiaat siammarsimaffigisaannik piorsarsimassusaannillu oqaluttuartuullutik.
Sumiiffiit taakkua 307 kvadratkilometerinik annertussuseqarput, tamaaniillutillu qallunaatsiaqarfiit pingaarutillit soorlu Qaqortukuluumi oqaluffik savaateqarfiillu nutaaliaasut.
Katersugaasivik saqqummersitsinermut atatillugu ullumikkut innuttaasut assinginik nutaanerusunik, oqaluttuarisaanermi piffissamut sanilliussissutitut, aamma saqqummersitsivoq.
Allagartarsuit saqqummersinneqartut saniatigut eqqumiitsuliortup qanganngoreersup Johan Markussenip qalipagaanik saqqummersitsiviup sinnerani nivinngaatiterisoqarsimavoq.