Aasaanerani nalunaaqutaq
Aasaanerani nalunaaquttap sinittarneq peqqissuserlu aserorsinnaavai
Aasaanerani nalunaaquttap atuutilernera ulorianartoqanngitsuunngilaq, immikkut ilisimasallit arlallit isumaqarput. Ajornerpaaguni inuunermik akeqarsinnaavoq
Arfininngornermi unnukkut ukiuunerani nalunaaqutamit aasaanerani nalunaaqutamut nuukkutta tamanna amerlasuut akunnermik ataatsimik sininnikiffigissavaat.
Kinguneqaateqarpoq
Ilisimatusarnerup takutippaa tamatuma kingunerisinnaagai ataasiinnarmik aallussiuminaatsitsienq, ilikkaruminaatsitsineq naggataatigullu uummallulerneq, tamannalu sininnermik ilisimasallip Mikael Rasmussenip ernumanartoqartippaa.
– Aallaavigalugu aasaanerani nalunaaqutaq peqqissutsitsinnut pitsaasuunngilluinnarpoq. Innuttatsinnut atugassarisanik pitsaanerpaamik aaqqissuussanik pilersitsiniartariaqarpugut, iluaqutaanngiarlu ukiumut marloriarluta nalunaaqutaq allanngortittaratsigu, taanna oqarpoq.
Taqqamik milittoortut amerlipput
USA-mi MIchigan University-mi ilisimatusarnermut suliniutip takutippaa ukiuunerani nalunaaqutamiit aasaanerani nalunaaqutamut nikinnerup kingorna ulluni uummatikkut taqqamik milittoortut 24 procentimik amerleriarsimasut, misissuinerlu tamanna svenskit, tyskit finskillu ilisimatuuinit malitseqartinneqarsimavoq, tamarmillu taamatut inerniliisarput.
Hjerteforeningimi ilisimatusarnermut pisortap Gunnar Gislasonip tamanna nammineq ilisimatusarfigisimanngilaa, isumaqarporli aasaanerani nalunaaqutaqartarneq eqqarsaatigeqqittariaqartoq, ilisimatusarneq aamma tamatuminnga tikkuussimmat.
Piffissaq atorfissaqartinneqarpoq
Aasaanerani nalunaaqutaq atuleraanga akunneq ataasiinnaq tiguneqartaraluartoq, amerlasuunullu inuunermik toqumilluunniit apeqqutaanngitsoq, ilisimatuut isumaqatigiissutigaat minutsit 60-it taakkua sunniuteqanngitsuunngitsut. Tassami timip piffissakkut naleqqussarniarluni piffissaqarnissani eqqissisimanissanilu atorfissaqartippai.
Ulorianarnera annertusisinnaavoq
– Sininneq uummammut pingaaruteqartorujussuuvoq, nalunngilarpullu inuit sininnermik ajornartorsiutillit uummammi taqqamikkut napparsimalernissaminnut ulorianartorsiornerusut, Gunnar Gislason oqarpoq nangillunilu:
– Sinissaaleqineq ulorianartorsiortitsinerulertarpoq, pissutigalugu stresserneq allanngortarmat. Stresshormonit arlallit timimi kaajalutaartarput, pisariaqartitamik qasuersaartoqanngimmat. Taamaasilluni aap naqitsinera qaffassinnaavoq, taavalu uummammi taqqakkut nappaateqalernissamik pingaartumillu iluaallersinnaanermik ulorianartorsiorneq annertunerulerluni, taanna oqarpoq.
/ritzau/