Pilersuineq
Aarhus Havn Kalaallit Nunaata umiarsualiveqarfigilissavaa
Royal Arctic Linep Kalaallit Nunaannut niuernermi aallaavini Aalborg Havnimiit Aarhus Havnimut nuunniarpaa
Kalaallit Nunaannut assartuinermi umiarsualineqarniunnermi Aarhus Havn ajugaasussatut ilimanarsivoq. Taamatut allappoq Århus Stiftstidende, taassumalu paasissutissaq tamanna pillugu Danmarks Radio issuarpaa.
Umiarsuit anginerusut
Ukiuni 45-ni Aalborgimeereersimalluni Royal Arctic Linep Aalborg Havn Kalaallit Nunaata umiarsualiviatut atorumajunnaarpaa. Århusilu toqqarneqarmat tamatumunnga pissutaavoq umiarsuaatileqatigiiffiup namminersorlutik oqartussanit pigineqartup kissaatigimmagu islandimiut umiarsuaatileqatigiiffiat Eimskip peqatigalugu Kalaallit Nunaannut niuernermi umiarsuarnik nutaanik sananissaq.
Umiarsuit nutaat ima angitigissapput Aalborgimi Grønladnshavnemut pulammassinnaassanatik. Taamaattumik Aarhus Havn anginerujussuaq Royal Arctic Linemut aallaavittut umiarsualivittut naleqqunneruvoq.
2019-imi?
– Royal Arctic Linep Aalborg Havn qimakkusummagu tamatumunnga pissutaavoq Aarhus Havnip pitsaanerusumik assartuinermut piumsaqaatit naammassisinnaammagit pitsaanerusumillu attaveqarfiusinnaalluni, Royal Greenlandi pisortaa Verner Hammeken oqarpoq, Århus Stiftstidendelu naapertorlugu taassuma Aalborg Havn 2019-imi qimanniarpaa.
Taarsiivigineqarnissamik piumasaqaat
Aalborg Havnimik qimatsiniarneq assortuussutaavoq, umiarsualivik naapertorlugu umiarsuaatileqatigiiffik isumaqatigiissutikkut pisussaaffeqarmat 2022-p tungaanut Aalborg Havn atussagaa. Taamaanngippat Royal Arctic Line 200 millioner koruuninik taarsiiffigineqarnissamik piumasaqarfigineqarsinnaavoq.