Aaqqissuisuuneq innersuussivoq: Nunaqarfinni aalisarneq suliffeqarfinnik soqutiginnilersitsivoq

Suliffeqarfiit aalisarnermik suliaqartut, aqutsiveqarfik Upernaviup nunaqarfiini, aalisakkerivinnik pilersitserusunnerat annertusiartorpoq. Nunaqarfinnili aalisakkeriviit amerlavallaalissappata, tamanna sulisussaaleqinermik kinguneqarsinnaasoq, Avannaata Kommunianit ernumassutigineqarpoq

Kullorsuarmi aalisakkerivik Upernaviup eqqaani tunitsiviit arlaliusut ilagaat.

Birgitta Kammann

Arne Mølgaard

arfininng 29. sep 2018 07:33

Annonse

Suliffeqarfiit namminersortut aalisarnermik suliaqartut, aqutsiveqarfik Upernaviup nunaqarfiini aalisakkerivinnik pilersitserusuttut ukiuni kingullerni amerliartorput.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiul imaluunniit mail adm@sermitsiaq.gl allaffigalugu

Nunaqarfinni aalisakkeriliornissamik siunertaqarlutik nunaminertanik qinnuteqaatit qulit missaanniittut Avannaata Kommunianit tunniuneqarnikuupput. Taakkunannga pingasut Kullorsuarmi aalisakkeriliornissamut tunngasuupput. Nunaqarfinnili inukinnerusuni aalisakkerivinnik nutaanik sanaartortoqassappat, tamanna sulisussaaleqinermik kinguneqarsinnaasoq, Avannaata Kommuniani borgmesteri, Palle Jerimiassen isumaqarpoq. Aappilattumi Royal Greenlandip aalisakkeriviani tunisassiorneq aasaq piffissap ilaani sulisussaaleqineq pissutingalugu uninngagallartariaqarsimasoq, borgmesterip assersuutitut taavaa. Taamaattumik qinnuteqaatit ilumut piviusorsiornertut sukumiisumik nalilersorluarneqartarnissaat, Avannaata Kommuniata aamma Namminersorlutik Oqartussani Piniarnermut Aalisarnermut Nunalerinermullu Pisortaqarfiiup isumaqatigiissutigaat.

– Aammattaaq nunaqarfinni aalisakkeriveqareertuni nutaamik aalisakkeriliornissat piviusorsiornertut nalilersugassat ilagaat. Minnerunngitsummillu sulisussat naammattut pigineqarnertut nalilersugassanut ilaalluinnarpoq, Palle Jerimiassen oqarpoq.

Aqutsiveqarfik Upernavimmi qalerallit 9.500 tons 2017-imut 2018-imullu pisassiissutigineqarput. Ukiulli tamangajaasa qaleralinnut pisassiissutaasuniit 2.000 tonsit tungaannut pisarineqanngitsoortarput. Taamaattumik pisassiissutit sooq taamak amerlatigisut pisarineqanngitsoortarnerat paasiniarlugu, kommunimi atorfilittat suliakkerneqarsimasut, borgmesteri oqarpoq. Nuussuarmi aamma Upernavik Kujallermi aalisakkeriviit qerititsiviisa imarisinnaasaat killeqarmata, tunisassiorneq ukiut tamaasa piffissami sivisuumi uninngasariaqartarpoq. Taamaattumik Royal Greenland A/S Upernavik Kujallermi qerititsiveqarnikkut inerisaanissamik pilersaaruteqarpoq. Kiisalu Arctic Fish Greenland A/S Nuussuarmi aalisakkeriviup qerititsiviisa containerit arfiniliusut ilaneqarnissaannik pilersaaruteqarpoq.

Kommunip suliniutai

Avannaani aalisarnermik inuussutissarsiuteqarnerup unammilleqatigiinnerullu annertusiartornera ilutingalugu, umiatsiaararsortut atugaasa eqqumaffigineqarnissaat pingaaruteqartoq, Avannaata Kommuniani Inuussutissarsiornermut Ingerlatsivimmi pisortaq, Hans Peter Lennert, oqarpoq. Taamaattumik Avannaata Kommuniata aaqqissuussaanik Ilulissani oktoberimi inuussutissarsiornermik takornariaqarnermillu ineriartortitsineq pillugit isumasioqatigiissitsisoqassaaq. Ukiuni kingullerni sinerissap qanittuani aalisartut nutaanik anginerusunillu angallatitaartornerat ilutingalugu, qaleralinnik saarullinnillu aalisarneq annertunerusumik ingerlanneqalerpoq. Taamaattumik aalisakkerivinni tunisassiornerup maannakkornit annertunerusunngortinneqarnissaanut periarfissat misissuiffigineqarnissaat, kiisalu umiatsiaararsornerup ineriartuutaasumik ingerlanneqarsinnaanera, isumasioqatigiinnermi ilanngullugit eqqartorneqarumaartut, inuussutissarsiornermut pisortaq oqarpoq.

– Avannaani aalisarnermik inuussutissarsiuteqarnerup ineriartortinneqarnerata annertusiartornera ilisimavarput. Taamaattumik umiatsiaararsortut aningaasanik aqutsinermut tunngasunik siunnersorneqartarnissaannik ingerlataqarnissarput pingaaruteqarpoq, Hans Peter Lennert oqarpoq.

Ukioq manna aappaagulunniit aalisakkeriviit pillugit isumasioqatigiissitsinermik Avannaata Kommunia pilersaaruteqarpoq. Tassani aalisakkerivinni sulisussaaleqisarneq ilaatigut eqqartorneqassaaq.

Nunaminertamik qinnuteqaatit NunaGis.gl, imaluunniit kommunerisami innuttaasunut sullivianut saaffiginninnikkut pisinnaapput.

Aqutsiveqarfik Upernaviup nunaqarfiini aalisartoqarfiusuni nunaminertat sanaartorfigissallugit soqutigineqarnerusut, Avaannata Kommuniani nunaminertanut qinnuteqaatinik suliarinnittartoq, Helene Sofia Sandgreen, oqarpoq. Nunaminertanut qinnuteqaatit katillugit 26-t kommunimut tunniunneqarnikuupput. Taakkunannga qulit missaat aalisakkeriliornissamut siunertaqarput.

inuussutissarsiutit nunatsinnit