Aaqqissuisuuneq innersuussivoq: Nappartat manngertornisut kulturikkut eqqaassutissat

Amerikamiut sakkutooqarfigisimasaanni uuliamut nappartakunik manngertornisunik illuutikunillu saliineq ungasinngitsukkut aallartissaaq. Nunattali Katersugaasiviani ilisimasallit suut tamaasa piiaannarnissaat mianersoqqussutigaat

Bulldozerit aallartinnginneranni eqqasarluaqqaaritsi, Nunatta Katersugaasiviani ilisimasallit mianersoqqusipput.

Uuliamut nappartakut illuutillu manngertornisut kulturikkut eqqaassutissaapput sorsunnersuup kingulliup nalaani Kalaallillu Nunaanni Amerikamiut sakkutooqarfiini pissanganartunik oqaluttuassartaqartut.

Aaqqissuisuuneq innersuussivoq

Allaaserisaq una aviisimit AG-mit tigusaavoq, aaqqissuisuunermit Christian Schultz-Lorentzenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiul imaluunniit mail adm@sermitsiaq.gl allaffigalugu

Maannakkorpiaq mianersoqqusisoqarpoq, Amerikamiut sakkutooqarfigisimasaanni saliinissaq aallartittussanngormat.

Tamanna ukiorpassuarni naalakkersuinikkut suliaasimavoq ajortoq Kim Kielsenip arlaleriarluni Danmarkimi naalakkersuisunut qaqittagaa. Siornali naalagaaffeqatigiit ataatsimiinneranni Naalakkersuisut siulittaasuata ministeriuneq Lars Løkke Rasmussen isumaqatigiissuteqarfigaa Amerikamiut sakkutooqarfigisimasaasa ilaanni saviminikunik eqqakkanillu ulorianartunik saliinermi Danmark akileeqataassasoq.

Danmarkimi naalakkersuisut saliinermut 180 million koruuninik aningaasaliipput. Atorfilittanik aqutsisoqatigiinnik kalaallinik qallunaanillu inuttaqartumik pilersitsisoqarsimavoq, taakkulu suliassamut pilersaarutaat takkutingajalerluni.

- Sapinngisamik sukkanerpaamik naammassissaagut. Maluginiaqquarput Nunatta Katersugaasivianit immikkut ilisimasallit akuutinneqassammata. Maannakkuugallartoq aqutsisoqatigiinni oqaloqatigiittoqarpoq ingammik Ikkattimi Marrarmilu saliinissami qanoq aallartinnissarput pilersaarusiorlugu. Naalakkersuinikkut annertuumik sammineqarpoq avatangiisinut tunngasut pitsaasumik suliarineqarnissaat, Pinngortitamut avatangiisinullu Naalakkersuisoqarfimmi pisortaq Mette Skarregaard oqarpoq.

Ikkatteq Marrarlu

Bulldozerilli aallartitsinnagit Nunatta Katersugaasivianit ilisimasallit sumiiffiit marluk saliiffigineqaqqaartussat misissoqqaassavaat.

Pineqarput Tunumi Amerikamiut sakkutooqarfigisimasaa Tasiilap eqqaani Ikkattimi Bluie Two East, Mette Skarregaard naapertorlugu uuliamut nappartakut manngertornisut 100.000-t tungaannoortut tassaniissorineqarlutik.

Tamatuma saniatigut Nuup kujataani Marrarmi Amerikamiut mittarfigisimasaani saliisoqassaaq.

Ukiorpassuani Pituffiup eqqaani eqqakkat ulorianartunik qinngorneqartut naalakkersuinikkut perulliuutaasimaqaat.

Isumaqatigiissumili Naalakkersuisut siulittaasuata Kim Kielsenip avatangiisinullu ministeriusimasup Esben Lunde Larsenip januaarimi isumaqatigiissutaani Camp Century Pituffillu ilaatinneqanngillat. Aamma Kangilinnguit.

Aallaqqaammut Ikkatteq aamma Marraq pineqarput.

Kulturikkut eqqaassutissat pingaarutillit

Pilersaarutaavoq Nunatta Katersugaasivianit ilisimasallit marluk qaammatip tulliani Marrarmi Amerikamiut sakkutooqarfigisimasaani misissuilissasut nalunaarsuillutik.

- Inuppassuit Amerikamiut sakkutooqarfikui nappartanik manngertornisorpassuaqartut kusanaatsutut isigisarpaat. Pingaartuuvorli eqqaamassallugu sorsunnersuarmi kingullermi USAllu Kalaallit Nunaanniinneranit pingaarutilinnik oqaluttuassaqarmata. Illuutit manngertornisut uuliamullu nappartakut ukiorpassuarni tassaniissimapput nunap isikkuanut ilaalerlutik. Peerukkunik takuneqaqqinngisaannassapput, Nunatta Katersugaasiviani qanganisarsiooq Hans Harmsen oqarpoq.

Eqqaviinnaanngitsut

Hans Harmsenip eqqaasitsissutigaa Amerikamiut Kalaallit Nunaanni sakkutooqarfeqarnerat oqaluttuarisaanerup nutaaliaasup ilagigaa pingaarutilerujussuaq. Mittarfiimmi Atlantikoq qulaallugu silaannakkut ikaartarfiupput pingaarutillit naggataagut iligiit Hitlerimut ajugaanerannut peqqutaaqataasut.

- Amerikamiut sakkutooqarfikui eqqaaviinnaanngillat. Eqqaassutissaapput, Kalaallit Nunaanni oqaluttuarisaanermik nutaanerusumik oqaluttuartut, Hans Harmsen oqarpoq, mianersoqqussutigalugulu Ikkatsimit Marrarmillu suut tamarmik pisoqqatut eqqagassatut isigineqaannassanngitsut.

Nunatta Katersugaasiviani pisortap tulliata Bo Albrechtsenip aamma Amerikamiut sakkutooqarfigisimasaat kulturikkut eqqaassutissatut pingaarutilittut taavai.

- Tassaaginnanngillat nappartakut manngertornisut illukullu qimatat. Inunnit pilersitaapput uppernarsassallugit pigiinnassallugillu pingaarutillit. Ilaat eqqaassutissatut toqqartariaqarpavut Amerikamiut tamaaniissimanerannut takussutissatut. Oqaluttuarisaanermut nutaaliaasumut eqqaassutissaapput pingaarutillit. Aamma taamaapput Jyllandip kimmut sineriaani tyskit bunkerii kusanaakkaluaqisut, Bo Albrechtsen oqarpoq.

Amerikamit naasut

Nunatta Katersugaasivianit Inge Bisgaardip eqqaasitsissutigaa takornarialerisorpassuit Ikkatteq angalaarfigitittaraat.

- Ikkattimi nappartut manngertornisut Amerikamit naasunik taaneqartarput. Nunaannarmi eqqumiitsuliatut isikkoqarput. Naak inuppassuit isumaqaraluartut kusanaatsut oqaluttuassartatta pingaarutillip ilagaai, takorniariat uagullu pinngortitami atuarsinnaasavut.

Mette Skarregaard oqarpoq, avatangiisinut pingaarutilittaa tassaasoq pitsaasumik saliinissap sumiiffimmilu mingutsinneqarsimasinnaasut qularnaarnissaa.

- Saliisoqassasoq naalakkersuinikkut isumaqatigiissutaavoq. Maanna aqutsisoqatigiit suliassaq naammassiariaqarpaat ilaatigut qulakkeerlugu Nunatta Katersugaasivianit ilisimasallit akuutinnissaat, Mette Skarregaard oqarpoq.

Uani ataani aviisimut AG-mut digitaliusumut isissutissarsisinnaavutit:

Powered by Labrador CMS