Aaqqissuisuuneq innersuussivoq: Eurojackpotimi eqquisoq Tasiilameersoq: - Eqqukkat atugassanik toqqissisimanarnerusunik qulakkeeruppaatigut

Uani sapaatip-akunnerani 'Aaqqissuisuuneq innersuussivumi' Eurojackpotimi eqquisoq Tasiilameersoq Gaba Kristiansen pillugu Sermitsiami saqqummertumi atuagaqarsinnaavutit.

– Aningaasarsiat tulliisa kontomut ikineqarnissaata tungaanut taartaagallartutut akissarsiakka sapinngisannguatsinnik ileqqaartarsimavavut. Maannali 5,4 millioner koruunit sinnerlugit eqquinerma kingorna eqqissisimaarnerulaarsinnaanngorpugut, 44-nik ukiulik Eurojackpotimi eqquisoq, Tasiilameersoq Gaba Kristiansen, oqarpoq.

Kisianni eqquerujussuarsimanermi paasinissaata tungaanut ullorpassuit ingerlasimapput. Ilaqutariit tallimanngornerup kisitsisit makinneqarfigisaata kingorna sapaatip-akunnerata naanera tamakkerlugu aaqqissuussinernik sammisaqarsimapput.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiul imaluunniit mail adm@sermitsiaq.gl allaffigalugu

– Allaammi sapaatikkut arsaakkiarpunga ajoquserlungalu, taamaattumillu eqquiniutima misissornissaanut periarfissaqarnanga. Allaammi sapaatip-akunnerata naaneranut eqquiniummilluunniit pisisimanerlunga eqqaamanngilara, oqaluttuarpoq.

Aatsaat nuliakumi nuannariinnarlugu aperimmani eqquiniummik pisisimanersoq nammineq illoqarfimmiunit tamanit oqaluuserineqarsimasinnaanini pasitsaakkiartulerpaa.

– Eqquisup suli nassaarineqarsimannginnera illoqarfimmi oqaluuserineqangaatsiarpoq. Inuit Facebookimi allattarput, eqquisoq nassaarineqarsimasoq, arnaasorlu Mariamik atilik, taamaariarmallu eqqarsaatigiunnaarpara. Kisianni marlunngornerup aqaguani KNR-ip nittartagaatigut atuarpara, eqquisoq suli nassaarineqarsimanngitsoq, aatsaallu tassani uangaasinnaanera pasitsaakkiartulerpara. Uummatiga ingerlarsulerpoq, oqarpoq ilassuteqarlunilu:

- Kisianni unnunnissaanut utaqqisariaqarpunga, suliffinnukarlunga eqquiniutiga ujariartorlugu, sunaaffalumi ilumoortoq, eqquiniutinni kisitsisit eqqortut tallimat stjernetalilu ataaseq nassaassaapput.

Namminersortoq

Gaba Kristiansen siusinnerusukkut nuliaqarsimagaluarpoq ullumikkullu inooqatini ernertillu inooqatigalugit. Ataatsimut katillugit tallimanik meeraqarpoq marlunnillu meerassaqarluni. Allaffimmiutut ilinniagaqarsimavoq Royal Arctic Linemilu suliffeqarnermi, umiarsualiviup pisortaatut atorfeqarfigilikkami, kingorna 2014-imi misiliilluni namminersortunngorpoq. Biilinik atornikunik pisivoq illoqarfimmilu biiliutilinngorluni.

Ajoraluartumik pilersaarutit malillugit ingerlasoqanngilaq, biilillu atornikut aningaasaqarneranut artukkiipput biilit ukiup affaa ingerlariiginnartorli arlalippassuariarlutik iluarsaanneqartariaqalermata. Aningaasat ikiligaluttuinnarput, akiligassamilu akilernissaat ajornakusoortilerpaa naggataatigullu suliffeqarfiutini matuinnartariaqalerlugu.

Taamaattumik 2015-imi suliffissioqqilerpoq inuussutigisassanik aningaasarsiorsinnaajumalluni. Atorfinnut arlalissuarnut qinnuteqartaraluarpoq iluatsitsinanili, 2016-imili taartaaffigisassaminik nassaarluni. Taamaalilluni ukioq tamaat allaffimmiutut kontorfuldmægtigitut taartaalluni sulisimavoq tamatumalu oqitsuinnaasimannginnera nassuerutigerusussinnaallugu. Ulloqartarsimavoq innaallagissamut akiligassat akilernissaannut akissaqarfiginngisaanik imaluunniit illuminut, 2012-imiilli najugarisaminut, kiassaatip ikummatissanik pisinissamut akissaqarfiginngisaanik.

– Kisianni naak ullumikkut ulluinnarnut akissaqarneruleraluarluta isumaqatigiippugut inuunerput allanngortippallaassanngikkipput. Piisaapilulluta inuussanngitsugut.

Nuliarisimasani aappanilu aamma isumaqatigiissuteqarfigisimavai, meeqqat pitsaasunik atisartaassasut pinnguanillu elektroniskiusunik meeqqat allat aamma pigisaanik pisaassasut.

– Kisianni aningaasat pisaapilunnikkut atulussinnarneqassanngillat, aningaasat qanoq naleqartiginerat ilikkarsimavara, oqarpoq.

Gaba Kristiansen nassuiaalluni oqarpoq, misilittakkani ilinniutigisorujussuusimallugit:

- Ajornerpaaffianiimmat nuanniingaatsiarsimavoq.

Nutaanik biilitaassasoq

Gaba Kristiansenili illumi iluarsaannissaanut kiisalu biiliniik, umiatsiamik qamuteralannillu nutaanik pisinissamut pilersaaruteqarpoq.

- Maanna soqutigisakka aamma aallunnerusinnaanngorpakka, umiatsiamik angalaneq siuaasamalu sumiiffimmi maani nunaqarfigisimasaannik misissuineq pinialunnerlu. Taamaattumik umiatsianik misissuiartorlunga ungasinngitsukkut Nuummukarnissannik pilersaaruteqarpunga. Nunaqarfimmi illumik pisinissara aamma naatsorsuutigaara.

Aamma kingusinnerusukkut Islandiliarlunilu Danmarkiliarusuppoq ilaquttani peqatigalugit feeriarniarluni.

– Anaanaga Danmarkimiinngisaannarsimavoq, taamaattumik takutikkiartorusuppara, qatanngutini taassumalu ilaqutai aamma tikeraarsinnaaniassammagit, oqarpoq.

Namminersortunngoqqinnissamik aamma eqqarsaatiginneqqilerpoq. Kisianni biiliutilittuussanersoq allatuussanersorluunniit suli aalajangiutinngilaa.

- Kisianni akilersinnaasuunissaa qularutissaanngilluinnarpoq. Meerarpassuaqarpunga siunissarlu aamma eqqarsaatigisariaqarlugu, oqarpoq.

Aviisi Sermitsiaq tamaat atuaruk, taanna uani ataani linki aqqutigalugu aviisi isissutissarsiffigisinnaavat:

Powered by Labrador CMS