Aaqqissuisut: Tivolimi aaqqissuussisarnerup soqutigineqarnera annertusiartorpoq

- Tivolimi ullut marluk ingerlanerit assorsuaq nuanneqaat, ukioq mannami inuit aamma qiimasimaqaat, 'Kalaallit Nunaat Tivolimi' projektleder, Miki Jensen Sermitsiaq.AG-mut oqarpoq.

Inuillu qanoq amerlatigisut, parki nuannaarniartarfimmi nuannannermut misigisaqariartorlutik takkussimanersut, taanna Tivolimit suli paasitinneqarsimanngilaq.

- Kisianni ilimagaara ulluni taakkunani marlunni 50.000-t sinneqarsimasut, inunnimmi ulikkaaqqasimavoq. Suulli tamarmik pilersaarutit malillugit ingerlasimapput. Ukiuni kingullerni pingasuni sapaatip-akunnerisa naanerini ingerlanneqartarsimavoq, tamannalu pissutigalugu inuit ikinnerunissaat ernumassutigisarsivarput. Kisianni qujanartumik ukioq manna aamma nuannannermut inuppassuit takkussimapput, Miki Jensen oqaluttuarpoq.

Assit takukkit: Tivolimi nuanneqisumik naggataarnersiorneq

Soqutiginninneq annertusiartortoq

Aaqqissuussamut soqutiginninneq annertusiartortoq, taassumma aamma oqaatigaa.

- Takornarissat arlallit assut soqutiginnipput. Belgiamiu ataaseq Københavnimut nuannernermik misigisaqariartartoq naapissimavara. Australiamiulli aallartitaqarfianeersut qujassuteqarusuttut naapittussaavagut, kikkut nipilersortuusimanersut cd-nillu sumi pisisoqarsinnaanersoq arlaleriarlunga aperineqarsimavvunga , Miki Jensen oqarpoq.

Ukioq manna 'Kalaallit Nunaat Tivolimi' ataasinngornermi ulloq 31. juli aamma 1. august ingerlanneqarpoq.