Sermersuumi sumiginnaaneq
- Aaqqiipallattarnerit taamaatinneqassapput
Sapaatip akunnerani kingullermi Nuummi saqqummertut assinginik, inatsisip nutaap meeqqanik sumiginnaaneq pinngitsoortissavaa. Kommunit inatsimmik naammassinnissagunik suleruluttariaqarput.
Meeqqat annertuumik nakuuserfigineqarlutik imaluunniit kinguaassiuutitigut qaangiiffigineqarsimasut angerlarsimaffinni qimanneqartut.
Nakkutilliinermit nalunaarusiamit sapaatip akunnerani kingullermi allaatigisimasaani, Nuummi meeqqanut tamanna piviusuuvoq.
Kommunit maannamit ingerlaannaq iliuuseqartalissasut inatsisip nutaap naqissuserpaa - kisianni meeqqat ulorianartorsiortinneqartut pillugit nalunaarfigineqarsimatillutik, kingusinnerpaamik akunnerit 24-t ingerlaneranni.
Nakkutilliinermit nalunaarusiap saqqummernissaa ullormik ataatsimik sioqqullugu inatsit akuerineqarpoq.
Sukkasuumik aaqqiissuteqartoqartassanngitsoq
Kommunit inatsisip annguniagaanik naammassinnissinnaassanersut maanna apeqqutaaginnarpoq.
- Tamanna apequtissatsialaavoq, meeqqat illersuisuat Aviâja Egede Lynge Sermitsiaq.AG-mut oqarpoq.
Siornartigut nakkutilliinermit nalunaarusiaasarsimasut MIO-llu Qaasuitsup Kommuniani aamma Kommune Kujalllermi nammineq angalanerminit nalunaarusiarisartagaasa assingusunik meeqqat pisinnaatitaaffiinik tunngaviusunik unioqqutitsisoqartarmeranik takutitsisoqartareersoq uparuarpaa.
- Inatsisip nutaap siusinaartumik iliuuseqarnermut ukkataqarnera, kommuninillu ataavartumik nakkutilliineq aamma isumaginninnermut aqutsisoqarfimmik pilersitsineq iluaqutaassasoq neriuuteqarpunga, Aviâja Egede Lynge oqarpoq.
- Tamannali ullormiit ullormut pinavianngilaq.
Annertuumik suliniuteqartoqartariaqartoq
Inatsimmut nutaamut akisussaasup, isumaginninnermut naalakkerusuisup, Sara Olsvigip (IA) aamma isumaginninnermut aqutsisoqarfik nutaaq, inatsisit kusanartut siunertaannik piviusunngortitsisussat ilaattut taakkartorpaa.
Aqutsisoqarfiup kommunit ilisimasanik pisariaqartinneqartunik tapersersussavai. Inunnik isumaginninnermut siunnersortit inatsimmik qanoq iliortoqarnissaanik erseqqinnerusumik allaatiginnittumik aqutsinermut pikkorissarnerup piareersassavai.
- Inatsimmut isumalluartorujussuuvunga. Kisianni kommunit iliuuseqarlutik suliamut pimoorussinissaannik tamanna pisariaqartitsissaaq, Sara Olsvig oqarpoq.
Piumasaqaatinik naammassinnissasut
Kommuni inatsimmik naammassinninniarluni sapinngisaq tamaat ilungersorniartoq, Kommuneqarfik Sermersuumi borgmesteri Asii Chemnitz Narup (IA) neriorsuivoq. Meeqqat ernumanaatilimmik ulorianartorsiortut maannamit akunnerit 24-t iluanni ikiorneqartassapput.
- Piumasaqaatinik naammassinnissaagut, Asii Chemnitz Narup (IA) naqissusiivoq.
Kommunit pisussaaffimminnik naammassinninngippata, tassami isumaginninnermut naalakkersuisoqarfik inatsit nutaaq atorlugu kommuni meeqqanut isumaginninnikkut sulianik arsaarnissaanut periarfissaqarpoq.
Kommunit maannamit ataavartussamik aamma siunissamut isigisumik meeqqanut ulorianartorsiortunut suliniuteqassasut, meeqqat illersuisuata neriuutigaa.
- Nakkutilliinermit imaluunniit MIO-mit nalunaarusianik saqqummertoqartorlu aaqqiipallaannartarnerit maanna qaangertariaqarpagut, Aviâja Egede Lynge oqarpoq.