Thursday, July 6, 2017 - 08:32

Aappariit savaatillit pillugit filmiliaq nersornaaserneqartoq

Lars aamma Makka Nielsen pillugit filmiliaq franskit filmfestivalertitsineranni nersornaaserneqarpoq.
Assi.: Visit Greenland
Ulannaq Ingemannip Kujataa pillugu Visit Greenlandimut filmiliaa, takinngitsumik filmiliornermut Deauville Green Awardsimi Parisimi ajugaavoq

Isumassarsiaq ersarissoq aamma kusanartunik assitalik aningaasartuuterpassualinnut ajugaavoq.

Visit Greenlandip filmi takinngitsoq ''Explorers by Nature: Life of Sheep Farmers” Deauville Green Awardsimi Parisimi saqqummiummagu tamanna anguneqarpoq.

Savaatillit aappariit Lars aamma Makka Nielsen pillugit filmiliaq immikkoortumut piviusulersaarusianut Ecotourism and Responsible Travelimut filminik 25 minutsinit tikillugit sivisussuseqartunut peqataavoq.

Unammineq sakkortuvoq. Tassani immikkoortumi filmit tallimat unammeqataapput, tamarmillu nunap TV-eqarfissuininngaanneerlutik, ataasiakkaallu 25 minutsinik sivisussuseqarput.

Kisianni kalaallit pinngortitarsuullu akornanni ataqatigiinneq pillugu takinngitsumik filmiliaq, Ulannaq Ingemannimit filmiliarineqarlunilu katiterneqartoq qularnaatsumik ajugaasuuvoq.

- Una nersornaat suliatsinnik minnerunngitsumillu filmiliortut piginnaasaginneranut nersorinninneq annertuvoq, Visit Greenlandimi pisortaagallartoq, Anders La Cour Vahl oqarpoq.

Minutsinik pingasuinnarnik takissuseqarluni filmiliaq nakimatitsinngilluinnarpoq, naak unammisaat aningaasanik amerlanerusunik atugassaqarsimagaluartut.

- Una filmi takinngitsoq takornarianut ussassaarut nalinginnaasuunngilaq. Isigisanut saaffiginniinnarani aamma misigissutsinut saaffiginnippoq, Anders La Cour Vahl oqarpoq.

Deauville Green Awards spotsinut, paasissutissilluni filminut aamma piviusulersaarusianut piujuaannartitsineq sammisaralugu festivaaliuvoq. Filmiliortartut 370-it, NGO-t aamma takornariaqarnermut siunnersuisoqatigiit nunanit 35-neersut ukiormanna peqataapput. 

Seneste nyheder / Nutaarsiassat kingulliit