Nuimasuut ilagalutit
Aappariit Coster-Waldau Obama nereqatigaat
jesper Høvringip kjuuliliaa puisip amianik uigualik Nukâka Coster-Waldau-p atorpaa, aappariit Washingtonimi nereqatigiinnersuarmi peqataammata, tassanilu aamma præsidenti nulialu peqataapput
Det Hvide Hus-imi tusagassiortartut peqatigiiffiata White House Correspondents Association-ip, ukiumoortumik nersornaasiinerani kalaallimik peqataasoqarpoq. Isiginnaartitsisartoq tusaamasaq Nikolaj Coster-Waldau nulialu Nukâka Coster-Waldau arfininngormat tusagassiortut isiginnaartitsisartullu ilisimaneqartut allat ataqqinaataasumik nersornaatinik tunniussinermut nereqatigiinnermullu, Washington Hilton Hotel-imi ingerlanneqartumut, qaaqquneqarsimapput, dtassanilu Thue New York Times-imit, Associated Press-imit, ABC News-imit, The Washington Post-imit aamma The Wall Street Journal-imit tusagassiortut nersornaaserneqarput, taamatuttaarlu tusagassiortunngornianut legat-inik agguaassisoqarluni.
Aaqqissuussinerup nalaani, aamma præsident Obama-p nuliatalu peqataaffigisaanni, tusagassiortut, suliartik pissutigalugu kiffaanngissusiiagaasimasut, eqqaaniarlugit nipaallisimaqatigiittoqarpoq.
Puisip amianik uigualik
Nukâka Coster-Waldau kjuulimik qasertumik kusanartumik, puisip amianik uigualimmik, atorpoq, puisip amianillu sanaamik Great Greenlandimeersumik taskeqarluni. Kjuuli ilusilersorneqarlunilu sananeqarsimavoq qallunaamit ilusilersuisartumit Jesper Høvring-imit, Great Greenland suleqatigalugu. Puisip amianik uiguaq qernertoq alutorineqarluarpoq.
– Kjuuli alutorineqaqaaq amerlasuunillu oqaaseqarfigineqarpoq. Tusaamasat arlallit naapippakka, ilaatigut Lucy Liu. Arfininngormallu unnukkut Great Greenland Jesper Høvringilu taasaqattaarsimaqaakka, Nukâka Coster-Waldau Sermitsiaq.AG-mut oqaluttuarpoq.
– Nerersuarnerup kingorna franskit aallartitaqarfiannut festeriarpugut, tassanissaarlu kjuulera alutorineqaqaaq, Nukâka Coster-Waldau oqarpoq.