Aappariinneq pillugu kalaallisut TV-mi aallakaatitassiaq nutaaq

Aallakaatitassiami nutaami ’Aappariippugut’-mi inuusuttut aappariit pingaarnertut sammineqassapput. Piareersarnerit aallartereerput. Aallakaatitassiat marluk suliarineqassapput.

- Aallakaatitassiani pingaartillugu samminiarparput inuusuttut aappariinnerisa nukittorsarnissaa, aallakaatitassiani pilersaarusioqataasoq Pipaluk Kreutzmann Jørgensen Sermitsiaq.AG-mut oqarpoq.

- Pitsaanerusumik aappariissinnaaneq sammerusupparput aammalu sorlassillugu tikikkusullugu aappariinnerup nukittunerulernissaanut suut aqqutaasinnaanersut. Oqaloqatigiinnerit atorneqassapput taakkuli tikkuartuinermut misigineqarnissaat pinngitsoorniarparput, Pipaluk Kreutzmann Jørgensen oqarpoq.

Unammilligassat
Peqataasussat naatsorsuutigisinnaavaat sungiusaatitigut eqqarsartaatsikkut timikkullu unammillerneqarnissartik. Immiussiffiusinnaasut misissorneqareerput taakkulu kangerlummiillutillu Nuummiipput.

Unammilligassani Angajo Lennert-Sandgreen aqutsisuusassaaq.

- Qanilaarnerulernissamut sungiusaatit timikkullu misilinneqarfissat aqqusaarneqassapput. Tamakku sakkugalugit aappariinneq nukittorsarneqarsinnaavoq, Pipaluk Kreutzmann Jørgensen oqarpoq.

Immiussinerit juunimi juulimilu pissapput aallakaatitassiallu oktoberimi piareersimassallutik.

Aallakaatitassiami aappariit pingasut peqataasut tupaallaatissinneqarumaarput immiussinerit naammassippata asannerujoorfissamut nikinnissamik tunineqarumaarlutik.

Aallakaatitassiat qulequtaat ’Aappariippugut’ nalaatsornerinnaanngilaq.

- Taannami apeqqutitut aninneqarsinnaavoq aammali naqissusiinertut aninneqarsinnaalluni, Angajo Lennert- Sandgreen nassuiaavoq.

TV-mi aallakaatitassiortut suli soqutigivaat aappariinnik peqataarusussinnaasunik pissanganartumillu angalarusussinnaasunik pissarsinissartik. Pipaluk Kreutzmann Jørgensen aamma Angajo Lennert-Sandgreen Nuuk Centerimiittarniarput tallimanngornermi nalunaaqutaq 15.00-ip aamma 18.00-ip akornanni.