Rubinisiorneq

Aappaluttumi rubinisiorfik annaanneqarpoq: Ulloq nuannaarfiusoq

True North Gems Greenlandip akiliisinnaajunnaarnerata kingorna, Norgemiut ingerlatseqatigiiffiata LNS-ip tigusinnaagaa Naalakkersuisut akueraat

Norskit LNS-ip akiliisinnaajunnaartoq True North Gems Greenland (TNGG) ingerlateqqippaa. Aappaluttumi rubinisiornissamik akuersissutit LNS-ip tigusinnaagai, Naalakkersuisut ataasinngornermi akuersissutigaat.

LNS-ip TNGG-mi aktiat 27 procentii pigereerpai.

Tunisassiornermik aallartitsiniartoq
LNS Greenland Gems A/S-ip (LNSGG) rubinisiornissamik akuersissutit, TNGG-ip akiliisinnaajunnaarnerata kingorna tigusimallugit, ingerlatseqatigiiffik tusagassiuutinut nalunaarummi allappoq.

LNSGG ingerlatseqatigiiffiuvoq pilersinneqaqqammersoq, taanna LNS Greenland A/S-ip ataaniippoq, taakku tamarmik norskit ingerlatseqatigiiffiannit Leonhard Nilsen & Sønner A/S-imit (91,5 procent) aamma kalaallit ingerlatseqatigiiffiannit Greenland Venture A/S-imit (8,5 procent) pigineqarput.

- Aappaluttumi sanaartornerup naammassineqarnissaanut sulinerup piaartumik aallartinneqarnissaanik kinguneqarpoq, taamatullu kalaallit rubiniutaannik piaaneq aallartissinnaanngulerpoq, tusagassiuutinut nalunaarummi tamanna allaqqavoq.

Aningaasaateqartut
Aappaluttumi piaaffissaq piariingajalerpoq, kisianni tunisassiulernissamut TNGG aningaasaliisussanik pissarsisinnaasimanngilaq. Tassanili kingoraartissaa iluatsitsinerusimavoq.

- LNS-ip naammassinninnissamut aningaasaliissutissat qulakkeerpai, aamma rubinit niuerutigineqalernissaannut sulisoqarnissamut aningaasaliissutit pisariaqartinneqartut qulakkeerneqarput.

- Taamaammat sulisunut, piginnittunut, aatsitassarsiortunut Kalaallit Nunaannullu suliniutip piviusunngortinneqarnera nuannaarnerup ulloraa, tusagassiuutinut nalunaarummi taama naggasiisoqarpoq.

Powered by Labrador CMS