Aanngajaarniutinik eqqussuinermut iliuusissat ersernerluttut

Quppernerit marluinnaat.

Oqartussat angalasunik tikittunik, nassiussanik nakkutiginninnertik qanoq nukittorsarsinnaaneraat, taamaaliornikkut aanngajaarniutit Nunatsinnut pinngitsoortinneqarnissaat pillugu, Naalakkersuisut nassuiaasiaat taama naatsigaaq.

Tamannalu naammaginanngilaq, Inatsisartunut ilaasortat Steen Lynge aamma Siverth K. Heilmann Atassummeersut taama isumaqarput.

- Nassuiaammi paasissutissiinerup pitsaassusaa, quppernerni annikitsuinnarni sammineqarneranit takussutissiivoq, taamaasilluni naalakkersuinikkut aalajangersaaffissatut naleqassusia Inatsisartuni killilerujussuulluni, taakku pragraf 37 naapertorlugu apequteqarnerminni allapput.

Aalborgimi umiarsualivimmik aallussineq
Inatsisartunut ilaasortat taakku marluk aamma isornartorsiorpaat, qanoq Kalaallit Nunaannut aanngajaarniutinik eqqussuisarnerup akiorniarneqarnerata nukittorsarneqarsinnaanera, aammalu tassunga atatillugu danskit naalakkersuisuinut isumaqatiginninniarsinnaanerit ersarissumik nassuiarneqanngimmata.

Kissaatigineqarsimavoq nassuiaammi ilanngunneqassasut, tikinnermi pisattanik nassiussalerinermi aammalu Kalaallit Nunaannut nassiussalerinermi iliuusissat aalajangersimasut misissuisarnerit sunniuteqarlualernissaannut suuneri, aammalu aningaasaqarnikkut inuiaqatigiinnullu kingunerisinnaasaannut tunngassuteqartut.

Naalakkersuisulli siornatigut paasissutissiinikuupput:

- Suliniutit pitsanngorsarniarlugit periarfissaq tassaasinnaavoq misissuisarnerup tigusisartumiit nassiussisumut nuunneqarnera. Tamanna Kalaallit Nunaata aamma Danmarkip akornanni naalakkersuinikkut ingerlatsisuni isumaqatigiissuteqarnissamik pisariaqartitsivoq, qularnanngitsumillu taakkunani marlunni nutaanik inatsisiliortoqartariaqassagunarluni.

- Nunaata soorunami misissuinermut aningaasartuuteqartussaassaaq. Annissuinerup nalaani nakkutilliinerup isumalluutinik atuineq pitsaanerulersissinnaa-vaa, tassa nioqqutissat inuillu amerlanerpaartaat Aalborgimiit (umiarsuarmik) imaluunniit Københavnimiit (timmisartumik) aallaaveqarmata.

Suliffissanik annaasaqarfiusinnaasoq
Atassummilu politikerit taamatut aaqqiinissaq uisaallaatigaat, tassami taamatut aaqqiineq kalaallinut suliffissanik annaasaqaataassammat.

- Aningaasaqarnikkut suliffissaqarniarnikkullu sunniutigisinnaasai pitsaanerusumillu nakkutilliinerup iluaqutaasinnaanera imminnut naleqqersorsinnaajumallugit isumaqar- punga pissusissamisoortoq Naalakkersuisut piumaffigissagaanni suliniummut pitsanngorsaataasunik ersarissunik tunngavilersorluakkanillu saqqummiusseqqullugit, tamakku aningaasaqarnermut kingunerisinnaasai ilanngullugit.

Apeqquterpassuit
- Taamaattumik naatsorsuutigineqarsimasinnaavoq minnerpaamik nassuiaammi ajornartorsiutit tikkuartorneqartut sammineqarsimanissaat: Nassiussiffimmi misissuisarnermut iliuutsit nuunneqarsinnaaneri imaluunniit eqikkarneqarsinnaanerit (imartatigut nassuissuisarneq eqqarsaatigissagaanni Aalborgip umiarsualiviani Grønlandshavnimi), tassungalu kingunissat attuumassuteqartut. Taamaattoqanngilarli, Steen Lynge erseqqissaavoq.

Taamaattumik taakku Atassummi politikerit marluk ilaatigut paaserusuppaat, taamatut apeqqutinik saqqummiussisariaqarneq, neriuutigalutigu akissutit Inatsisartut apeqqutaannut akissutissaalersinnaajumaartut siusinnerusukkut Inatsisartunit ujartorneqarsimasutut.