Wednesday, January 10, 2018 - 08:42

Aallarnisaasut: Niqqutissat angerlarsimaffinnut pajugutigitikkit

Assi.: pr-foto
Inuusuttut aallarnisaasut marluk Nuummi kiffartuussinermik saqqummiusseqqammerput, tassani nittartakkakkut Brugsenimit nioqqutissanik pisisoqarsinnaavoq, angerlarsimaffimmullu aggiutsillugit.

Niuerfik nutaaq paju.gl-imik taaguuteqarpoq, taanna Jens-Christian Jacobsenimi aamma Nicolai Kreutzmannimit ingerlanneqarlunilu pigineqarpoq.

Ikinngut peqataalertoq
- Paju.gl pillugu isumassarsiaq oktoberimi 2016-imi pinngorpoq. Siullermik kisimiikkaluarpunga, ingerlaannarli paasivara suleqateqartariaqarlunga. Kammassuaralu sianerfigaara suleqatiserialugu, Jens-Christian Jacobsen, Paju.gl-imik piginnittoq oqarpoq.

- Jens-Christiaap isumassarsiani saqqummiummagu qulanngivillunga akuersaarpunga, taamanili suleqatigiilerpugut, ilaanni unnuaruullugu sulisarluta, suliap piviusunngortinnissaa anguniarlugu, Nicolai Kreutzmann, Paju.gl-ip piginnittuata aappaa oqarpoq.

Brugseni peqataasoq
Suliniutip isikkussaa piareermat, Brugseni attavigaat, suliniullu tassunga tunillugu. Ukiullu nikinnerani suleqatigiit atsioqatigiipput, sulinerlu aallartissinnaanngorpoq.

Naak ukioq nutaaq sioqqullugu aallartikkaluarlutik, nittartagaq suli inerisarneqartoq aallarnisaasut taakku marluk tusagassiuutinut nalunaarummi ilisimatitsipput. 

- Ulapeqaagut. Nittartagaq inerisarparput, nioqqutissanillu pajuttuilluta. Inuit taamatut niuernissamut pisariaqartitsisut sullillugit misigisaq assut nuannerpoq, Jens-Christian Jacobsen oqarpoq.

Sulisoqalertut
Aallartilluarneq pissutigalugu aallarnisaasut marluk sulisumik atorfinitsitsisariaqarsimapput.

Seneste nyheder / Nutaarsiassat kingulliit