Aallarnisaasoq suliffimmik taarsiisoq: Siunnersoqatigiinni sulilerpoq

Nerisassianik suliffeqarfimmik Greenland Food pilersitsisimasoq, Allan Chemnitz, Greenland Businessimi inuussutissarsiornermut siunnersortitut sulilerpoq.

Taanna Greenland Business-imi inuussutissarsiornermi siunnersortini ikittuusuni, suliffeqarfinnik aallarnisaasunillu toqqaannartumik suleqateqartuni aammalu kommuninik allanillu inuussutissarsiornerup ineriartortinneqarnerani, aallarnisaasarnermi avammullu niueruteqartarnermi suliaqartuusunik suleqateqartuni, ilaalerpoq.

- Misigisartakkannik immersueqataanissannut qilanaarpunga, aallarnisaasoq Allan Chemnitz tusagassiuutinut nalunaarummi oqarpoq.

Greenland Food Allanip nuliata Pakamas Chemnitz-ip aamma ernerata Martin Larsen-ip ingerlatiinnassavaat, aammalu ilerasuutissaqanngivilluni suliffeqarfik qimappaa:

- Greenland Food tunisassianik pisisartunit tigulluarneqartunik aammalu Kalaallit Nunaanni igaffilerinermi ineriartortitseqataalluartussatut neriunaateqartunik ineriartortitsivioreerluni, aallartilluareerpoq. Suliffeqarfiup aallartitseqataaffigisama, siunissami aamma nutaanik tunisassiaqarluni ingerlalluarnera ingerlaannassaaq, Allan Chemnitz oqarpoq.