Aalisartut suliassakinnerunerat nuannaarutigaa

– Neriuutigaara Royal Greenlandip Maniitsumi angallammik aalisakkanik uumasunik assartuinermik suliniutaa iluatsissasoq, soorlu ukiuni kingullerni marlunni taamaassimasoq, aalisarnermut, piniarnermut nunalerinermullu naalakkersuisunngorlaaq Nikolaj Jeremiassen (S) oqarpoq.

Royal Greenlandip saarullinnik uumasunik tunisassiornermik suliniutaa sapaatip akunnerata siuliani Jeremiassenip nammineerluni takuvaa, tassunga qaaqquneqarami.

Royal Greenland ukiuni kingullerni Maniitsup eqqaani angallammik saarullinnik uumasunik assartuinermik ingerlatsisimavoq. Saarulliit, aalisartut bundgarnersorlutik pisaat, uumatillugit ungalusamut uumatitsivimmut assartorneqartarput, aalisakkallu ullualunnguit tassaniiteriarlugit uumatillugit angallammik Maniitsuliaanneqartarput, tassanilu qummuattamiitinneqartarlutik.

Tamatuma kingorna saarulliit ingerlaannavik tunisassiarineqartarput.

Misileraanermit misilittakkat takutippaat saarulliit qangatut bundgarnersorluni pisarisartakkanit pitsaanerujussuusut.

Iluaqutissarpassualik

– Neriuppunga suliniut siunissami iluatsissasoq. Aalisariaaseq nutdaaq aalisartunut iluaqutissalerujussuuvoq. Aalisartut qangatut bundgarnersornertut tamaviaartigivallaarunnaarput, Nikolaj Jeremiassen oqarpoq.

Aalisartut saarullinnik niaquiaallutik erlaviiaallutillu piffissamik atuissanngillat.

– Aalisartut pitsaanerusumik siumut naatsorsorsinnaavaat qanoq isertitaqartigisinnaanerlutik. Aalisakkanik pisarineqareersunik tunisinissamut unitsisoqarpiarneq ajorpoq. Tamatuma saniatigut piffissaq bundgarnersorfik siusinnerisumut sivisunerulissaaq, Nikolaj Jeremiassen oqarpoq erseqqissarlugulu suliniut Maniitsumi suliffinnik amerlasuunik pilersitsisimasoq.

Ullumikkut aalisartut 38-it missaanniittut saarullinnik uumasunik angallatinut assartuutinut tunisaqartarput. MIsileraanerli tamanna ajornartorsiuteqanngitsoorsimanngilaq.