Mamaq
Aalisartut piniartullu tarajorterillutillu pujoorisut - ilaatigullu flamberiillutik
Aalisartut pinairtullu aqqaneq-marluk inuussutissanut ilinniarfimmi Inuilimi pisatik qanoq atorluarsinnaanerinik sapaatip akunneri marluk pikkorissarput. Pisamit suliarineqartartuinnaanngitsut aamma igiinnarneqartaraluartut qanoq atorluarneqarsinnaanersoq misiliitinneqarlutik
Pujoorivik assimi takusinnaasatsitut sakkortuavallaamik ikumatinneqartaraluartoq pujuukkat tarajortikkallu piareerneqartartut mamarluinnarput.
Uanimi sapaatip akunnerani aalisartut tarajorterivik pujoorivillu misilittarpaat. Kapisillit, eqaluit qalerallit aammalu nimeriaat eqalussuillu qernertut aamma ilinniartitsissutigineqarlutik.
Atuaruk: Nerisassiortut Inuilimit nutaat
Paarnat, kuannit, timianit akuutissallu assigiinngitsut pujuukkanut qanoq atorneqarsinnaanersut ilinniartitsissutigineqarput.
Pisarisartakkamillu qanoq ittuuneri iluamik paasisaqarfigalugillu qanoq salinneqartarnissaannik aamma ilinniartinneqarlutik.
Sapaatip akunnerata tulliani pujoorineq tarajorterinerullu ilinniartitsissutigineqaqqinnissaa pilersaarutigineqarpoq. Tassanili aalisakkat pujoorinerunani puisip arferullu neqai, timmissallu soorlu mitit appallu suliarineqassallutik.
Atuaruk: Assit takukkit: Inuilimi utoqqarnut kaagiliortitsineq
Pikkorissaaneq naammassippat najugaqartunut sassaalliisoqassaaq, taakku sapaatip akunnerini marlunnik ilinniartitsissutaasut inernera misilissinnaajumaarlugit.
Pikkorissaaneq aalisartunut pinairtunullu sineriammiittunut periarfissaalersinnaanera Inuilip neriuutigaa.