Aalisarneq

Aalisartut peqatigiiffiat: Tunisiartorluni umiatsiaaqqamik angalanerit navianarsinnaapput

Ikerasaarsummi pitsaanerusumik qerititsiveqarnerup tungaatigut atugassaqartinneqarusupput. Kangaatsiamummi umiatsiarluni tulaassiartorneq navianarsinnaasarpoq

Arkivfoto.

Ikerasaarsummit Kangaatsiamut aalisakkanik tunisiartorneq navianarsinnaasarpoq.

Nunaqarfimmi aalisartut pitsaanerusumik qerititsiveqarnerup tungaatigut atugassaqarusullutik taamaattumik oqariartuuteqarput. Tamanna pillugu Kommune Qeqertaliup borgmesterianut Ane Hansenimut (IA), kiisalu Inatsisartuni partiinut Siumumut, Partii Naleqqamut Inuit Ataqatigiinnullu allakkanik ammasunik nassiussaqarput.

- Noqqaanitsinnut tunngavigaarput umiatsiaararsortuinnaalluni Kangatsiamut tunisiartortarneq ulorianaattuinnaanngimmat, silami anorlertillugu taartillugulu ilaatigut inuuneq ulorianartorsiortillugu niusiartortariaqartaratta, Ikerasaarsummi aalisartut peqatigiiffiat sinnerlugu Anthon Petersen allappoq.

Upernaakkut tunitsivik
- Aammalu aasaanerani tunitsivik imaarneqareertillugu ammaraangat ilaatigut ullormiik ullormut suliassat toqqorsivinnullu naammatterertarmata, taamalu sapaatip akunneri marlugajaat umiarsuaqaqqinnissaatalu tugaanut Aalisartut tuniseqqinnissaminnut utaqqisariaqartarlutik, akilersugaqarlunilu kipiluttunartaqaluni, allappoq.

Qerititsiveqarnerli aaqqiivigineqarnissaa suli utaqqineqarallartariaqarpasippoq. Hans Aronsenip (IA) paragraf 37 naapertorlugu apeqquteqaataanut akissummi tamanna atuarneqarsinnaavoq.

Ikerasaarsummiulli anguniagartik suliarineqarumaartoq neriuutigineqarpoq:

- Neriuppugullu saaffiginnissut pimoorullugu timitalerlugulu naammassiniarneqassasoq. Siusinnerusumimi saaffiginnittaraluarluta iluuseqartoqarneq ajormat, Anthon Petersen.

Powered by Labrador CMS