pakatsineq
Aalisartut isumasioqatigiinnerannut politikerit takkutinngillat
Aalisartut piniartullu kattuffianni qullersat kamapput pissutigalugu isumaqaramik aalisakkat sinnikuinik aalisakkallu tamarmi atorneqarnissaanik apeqqutinut nuna tamakkerlugu politikerit naammattumik soqutiginninngimmata
Pollitikkikkut apeqqutaassaava aalisagaq tamaat atortassaneripput, imaluunniit tamanna ingerlatsiviit aalajangissavaat?
Tamanna ajornartorsiutip qitigigunarpaa pisat annertunerusumik aningaasarsiutigisinnaanerannut apeqqummi.
KNAPK-p marlunngormat tusagassiorfinnut nalunaarutikkut politikerit ingerlatsivissuillu kamaappai, naammattumik iliuuseqannginnerarlugit.ut– ´Saarulliit ulluannut´ (qanittukkut Nuummi ingerlanneqartumi, aaqqiss.) naalakkersuisoqarfimmi politikerit atorfillillu qaaqquneqarput, tupaallaatigeqisatsinnilli politikeri ataasiinnaq soqutiginnilluni takkuppoq, siulittaasoq Henrik Sandgreen allappoq.
Tunisassiornerulerneq massakkut
– Ajuusaarutigiinnarsinnaavarput politikerit ilisimasanik iluaqutissanik pissarsiniarnermi amerlavallaariarlutik soqutiginnippallaartannginnerat. Aalisakkat qeritiinnarneqartarnerat imaluunniit tisaannarneqartarnerat qanganngoreersimasariaqaraluarpoq - Piffissanngorpoq aalisakkat Kalaallit Nunaanni annertunerujussuarmik tunisassiarisalernissaannut, suliamilu tamatumani selskabersuit akisussaassuseqartariaqarput siuttuullutillu, taanna kaammattuivoq.
Aalisarnermik ingerlatsivissuit siusinnerusukkut oqarsimapput angusaqangaatsiarsimallutik, qalerallit raajallu eqqarsaatigalugit.
Nassaarsiullaqqinneq
Roayl Greenlandip ukiuni arlalinni qalerallit paperui niaquilu Asiamut tunisarsimavai, Halibut Greenlandillu aamma aalisagaq tamangajaat (erlavii ilanngullugit) tunisarsimavaa.
Royal Greenland siusinnerusukkut amma oqarsimavoq raajanik tunisassiorneq ineriartortikkini, qaleralillu tamangajaat aningaasarsiutigalugu.
Ataatsimiititsinerpassuit ingerlattarpai
KNAPK ukiut kingulliit ingerlaneranni aalisakkat sinnikui pillugit arlaleriarluni pisoqartitsisarsimavoq. Assersuutigalugu islandimiut marluk qaaqquneqarsimapput, Atlantikup avannaani aalisakkat sinnikuisa qanoq atorneqartarnerannik oqalugiartillugit, tassanilu pingaartumik saarullik assersuutigineqarpoq.
KNAPK-lli Naalakkersuisut nersualaarpai suliniummut ersarissumik tapersersuinerannut, ilaatigut sapaatip akunnerata naanerani Kangaamiuni inuussutissarsiut tamanna pillugu isumasioqatigiinnermi.
– Puigussanngilarput nalimik qaffasinnerusumik pilersitsineq taamaallaat pisinnaammat tunisassiassap annertunerusumik tunisassiarineratigut. Tunngaviatigut igitassartai annikitsuinnaapput, saanikui nerpilaallit panerserneqarsinnaapput, niaqui panerserneqarsinnaapput, tingui, suai allaammi amia tunisassiarineqarsinnaapput. Taamaallaat annertunerusumik tunisassiarineratigut nalinga qaffasinnaavoq, taamaasillunilu aalisakkat tunineranni akiat qaffassaaq, Henrik Sandgreen siunissami periarfissat pillugit oqarpoq.