EU

Aalisartut EU-mut naaggaarput

KNAPK-p akuersaaruminaatsilluinnassavaa sinerissap qanittuani Nunatta aalisagartassaasa, avataanilu Nunatta nammineq alisariutaasa aalisarsinnaasaat EU-mut oqartussaaffigilertinnissaat

KNAPK-mi siulittaasup Henrik Sandgreenip EU naaggaarpaa

EU-mut ilannguteqqinneq isumatusaarnerunngilaq.

Polar Seafoofimi aamma Sulisitsisuni siulittaasoq, Henrik Leth, sapaatip-akunnerani kingullermi EU pillugu oqallisiginnittoqartariaqarneranik oqarnerata kingornga, aalisartut piniartullu kattuffianni KNAPK-mi siulittaasoq, Henrik Sandgreen, taama oqarpoq.

Kalaallit Nunaat EU-mut ilannguteqinneqarpat maanna attuumassutini attatiinnarneranit annertunerusumik iluaqutissartaqarnersoq, Demokraatit oqallisigissallugut ammaffigaat, Atassutillu EU-mut ilannguteqqinnissaq naaggaarluinnarpaat.

Atuaruk: Sulisitsisut siulittaasuat: EU-mut ilaasortanngorsinnaaneq Kalaallit Nunaata nalilersoqqittariaqarpaa

Ilaanani pitsaanerusoq
Henrik Lethip EU-mut ilannguteqqissinnaanermut tunngatillugu oqalunnermini, suna tunuliaqutigalugu oqalunnersoq, Henrik Sandgreenip paasiuminaatsippaa.

- Inuussutissarsiutini pingaarnertut inissisimasut aalisartut kattuffii apersorneqanngimmata, aammalu illuatungaannaa sooq naliliisinneqassanersoq.

- Kalaallit Nunaata EU-mut aalisagartassanik niueruteqarluni isumaqatigiinniarnerini, tassa Nunatta Karsiata ukiuni maannakkut pingasukkaani aningaasanik isertitsissutigisassaannik pissarsinissamut GE-mi Polar Seafoodimilu siulittaasup Henrik Lethip oqariartuutigiuartarmagu – Kalaallit Nunaannut ajunnginnerpaajussasoq, aalisagartassat Kalaallit aalisariutaasa namminneq aalisarpatigit, tassa nunatta aningaasatigut pissarsissutigisassai tassuunakkut annertunerussammata, KNAPK-mi siulittaasoq allappoq.

Atuaruk: Demokraatit: EU pillugu oqallinneq ammaqqittariaqarpoq

Eqqartuilluarnissaq pisarialik
Taamaattorli taassuma saniatigut oqaatigaa, eqqartuilluarnissaq aamma nalilersuilluarnissaq pisariaqartoq.

- Kisianni oqareertariaqanngilagut EU-mut ilaasortanngornissamik siunertaqarluta taamatut saqqummissasugut. Kattuffiit nunatsinnut aningaasarsiornermut pingaarutilimmik sammisaqartuusut minnerpaamik assigiimmik tusarniaavigineqartariaqarput, imaanngitsorlu oqarluartaarnerit ajugaassasut.

Henrik Sandgreenilu Islandimut qiviarnissamik kajumissaarivoq.

- Qanoq inuussutissarsiutigisaminnik pingaartitsinerminut tunngatillugu EU-mut ilaasortanngorniarnerigaluarnertik taamaatippaat, tassa nunatsinnitulli aalisarneq takornariaqarnerlu inuussutissarsiutini pingaarnertut ingerlatsisuunerat tassuuna aamma maluginiarneqartariaqarpoq, Henrik Sandgreen oqarpoq.

Atuaruk: Atassutip EU-mut ilaasortanngorsinnaaneq naaggaarpaa

EU pillugu aamma AG-mi oqallinneq malinnaaffigiuk. Uani ataani AG atuaruk

Powered by Labrador CMS