aalisartut ajornartorsiutaat

Aalisartut ajornartorsiutaat ombudsmandip suliarilerpai

Aalisarsinnaanermut akuersissutinik qinnuteqartut itigartinneqarnerat inatsisit malillugit pisimanersoq

Fiskernes klager ender hos ombudsmanden. Foto: Sermitsiaq arkiv

Aalisartut ikinngitsut Inatsisatut ombudsmandiannut maalaarsimapput aalisarsinnaanermut akuersissummik qinnuteqarnerminni itigartinneqareerlutik. Tamanna inatsisit malillugit pisimanersoq ombudsmandip misissortussanngorpaa.

Qaleralinniarsinnaanermut aamma saarullinniarsinnaanermut akuersissutinik qinnuteqaraluarlutik itigartitaasut itigartitaanertik akuersaaginnarumanagu ombudsmandimut maalaarsimapput.

2014-mi allanngortissavaat
- Aalisarnermut, Piniarnermut Nunalerinermullu Naalakkersuisoqarfiup sulianik aalisarnermut tunngasunik ataatsimut suliarinninneranik misissuinera tunngavigalugu aalisarsinnaanermut akuersissutinik qinnuteqaatit taama amerlatigisut itigartinneqartarsimanerannut inatsiseqartitsinikkut tunngaviusoq aamma naliliiffiginiarpara, Ombudsmandi Vera Leth oqarpoq.

Inatsilli allanngorallarnavianngilaq. Allannguutissatut siunnersuut saqqummiunneqassaaq taannalu pillugu tusarniaaneq aasap ingerlanerani aallartissaaq. Allannguutissatulli siunnersuut siusinnerpaamik 2014-mi upernaakkut Inatsisartut katersorneranni aatsaat suliarineqarsinnaavoq.

Naalakkersuisullu erseqqissarumavaat taamatut allannguinerit aatsaat sukumiisumik tusarniaanerit ingerlanneqareerpata pisinnaassammata, aalisarnermut Naalakkersuisoq Karl Lyberth Siumumeersoq nalunaarpoq.

Inatsisartut ombudsmandiat nammineerluni maanna annertuumik misissuileruttorput aalisarnermut piniarnermullu pisortaqarfimmi periutsinik.

Powered by Labrador CMS