Aalisarneq

Aalisarsinnaanermut akuersissutit aamma ukioq mannamut atuupput

Aalisarsinnaanermut akuersissutit siornameersut Karl-Kristian Krusep sivitsorpai, aamma 2016-imi atuuttunngortillugit

Aalisarsinnaanermut akuersissutit arlallit sivitsorneqarnerat ilaatigut umiatsiaararsortut iluaqutigissavaat

Umiatsiaararsortunut tamanut 2015-imi qaleralinniarnermut, saarullinniarnermut saattuarniarnermullu akuersissutit atuunnerat sivitsorneqarpoq aamma 2016-imi atuuttussanngorlugit, taamatut paasissutissiivoq Aalisadrnermut Piniarnermullu Naalakkersuisoqarfik.

– Tassa imaappoq, 2015-imi umiatsiaararsorlutik qaleralinniarnermut, saarullinniarnermut saattuarniarnermullu akuersissutillit tamarmik 2016-imi umiatsiaarsorluni aalisarsinnaanermut qinnuteqaateqassanngillat, Aalisarnermut, Piniarnermut Nunalerinermullu Naalakkersuisoq Karl-Kristian Kruse Naalakkersuisut-gl-ikkut paasissutissiivoq. Erseqqissaatigaalu 2015-imut umiatsiaararsortunut akuersissutit ukioq manna aalisarsinnaanermut tunisisinnaanermullu uppernarsaataasut.

Sinerissamut qanittumi aalisartut

Angallatit 6 meterit sinnerlugit angissusillit, ingerlatsiveqarfinni Upernavimmi, Uummannami Qeqertarsuullu Tunuani qaleralinniartut, januaarimi aalisarsinnaanermut akuersissummik tunineqassapput ukiumullu pisassiissutinik nalunaarfigineqassallutik.

Taamaattumik 2015-imut akuersissutit 2016-imi januaarip 31-ata tungaanut atuutissapput, taamaasilluni 2015-imi decembarip 31-ata kingorna aalisarneq nanginneqarsinnaalluni, Aalisarnermut Piniarnermullu Naalakkersuisoqarfik paasissutissiivoq.

6 meterit sinnerlugit angissusillit

Angallatinut 6 meterit sinnerlugit angissusilinnut sinerissamut qanittumi ingerlatsiveqarfinni Upernavimmi, Uummannami Qeqertarsuullu Tunuani qaleralinniarsinnaanermut akuersissutit , kiisalu sinerissamut qanittumi saarullinniarsinnaanermut akuersissutit ulluni makkunani nassiussuunneqarput, taamaasilluni aalisarneq 2016-imi ingerlaqqissinnaaqqullugit.

Saattuarniarnermut akuersissutit aamma ulluni makkunani nassiussuunneqarput.

Avataasiortut

Avataasiortunut pisassat agguataarneqarnissaat Naalakkersuisut akuersissutigaat. Taamaasillunilu 2016-imilu avataasiorluni aalisartunut akuersissutit selskabinut nassiussuunneqassapput, naalakkersuisoqarfiup ilanngullugu paasissutissiissutigaa.

Powered by Labrador CMS