aalisarneq piniarnerlu
Aalisarnermut politikkini Krusep avannaani saqqummiutissavaa
Aalisarnermut piniarnermullu naalakkersuisoq Karl-Kristian Kruse avannaani tikeraarnermini ilaatigut Royal Greenlandip suliffissui aamma Halibut Greenland ataatsimeeqatigissavai
Naalakkersuisuutitaqartut kingulliit aalisarnermut naalakkersuisuutitaat, Siumumit Finn Karlsen, avannaani illoqarfiit assigiinngitsut tikippai ukioq kingulleq. Finn Karlsenip aalisartunik piniartunillu ataatsimeeqateqarnermini qaleralinnik qaammammoortumik pisassiisarneq eqqartorpaat, kiisalu qilalukkanik pisaqarnermi nalunaarsuinngitsoortarnerit aamma ukioq kingulleq eqqartorneqarlutik.
Aalisarneq pillugu avannaani eqqartuisoqaqqissaaq aalisarnermut, piniarnermut nunalerinermullu naalakkersuisoq Karl-Kristian Kruse Ilulissani, Uummannami Upernavimmilu tikeraarpat.
Illoqarfinni tikitamini KNAPK-ip immikkoortortaasa sinnissaannik ataatsimeeqateqassaaq, soorlu aamma SQAPK-ip Ilulissani sinniisaannik aamma ataatsimeeqateqassasoq, Tusagassiivik ilisimatitsivoq.
Naalakkersuisuni ilaasortap tikitamini Royal Greenlandip suliffissui aamma pulaartassavai, Ilulissani aamma Halibut Greenland pulaassallugu, kilisaataatillit aamma pulaarneqassallutik.
Tusagassiiviup nalunaarutigaa illoqarfinni innuttaasunik ataatsimiititsisoqartarumaartoq naalakkersuisoq peqatigalugu.
Karl-Kristian Kruse avannaanukarluni aallassaaq januaarip 13-ani, innuttaasunillu ataatsimiititsineq kingulleq januaarip 17-ani ingerlanneqassalluni.