Aalisarnermut piniarnermullu nakkutilliineq nalilersorneqassaaq
Aalisarnermut piniarnermullu nakkutilliisut amerlineqassanersut ukiup tulliani KANUAANA-mit misissorneqassaaq.
Ullumikkut qulingiluanik piniarnermut nakkutilliisoqarneq tallimanik aalisarnermut nakkutilliisoqarneq pingasunillu ilinniartuuteqarneq ukiumut 14 millioner koruuninik aningaasartuutigineqartarput.
Naliliineq
2014-imi nakkutilleeriaaseq nutaaq eqqunneqarpoq ukiullu tulliani nalilersorneqassasoq, Aalisarnermut Piniarnermullu Naalakkersuisoq Erik Jensen IA-minngaanneersumut Peter Olsenimut paragraf 37 naapertorlugu akissuteqaammi paasissutissiivoq.
Nakkutilliisut naammannersut IA-mi ilaasortap Erik Jensenimut apeqqutigaa. Akissuteqaammi innersuussutigineqarpoq ukiup tulliani nalilersuisoqarniartoq tamatumalu kingorna nakkutilliisut amerlineqassanersut aalajangerneqassasoq.
Kinguaariit nikinnerat
Erik Jensenilu ima qularnaveeqqusiivoq:
- KANUAANA-mi nakkulilliinermi atorfillit iluanni kinguaariit nikinnerat ingerlanneqarpoq,
pilersaarutaallunilu sinerissap qanittuani aalisarnermik piniarnermillu nakkulilliinermik
suliassanut angalaffiusartunut nunamilu piniarnermik nakkulilliinermi atorfiit 18 - 20
attatiinnarneqarnissaat, Erik Jensen paasissutissiivoq.
Nakkutilliisulli angallatit atugaannik, angallatit ilaat ukiut 20-t sinnerlugit pisoqaassuseqalersimasunik misissuineq aallartereersimavoq.
Aserfallatsaaliineq akisooq
Ullumikkut KANUAANA-p ingerlatsinermut aserfallatsaaliinermullu ukiumut 8 millioner koruunit missaanni aningaasartuuteqarpoq. Ingammik angallatit Viksund Speed Shark-it pisoqalisimanerat pissutigalugu ingerlanneqarnerat akisungaatsiartoq, akissuteqaammi allassimavoq.