Aalisarneq

Aalisarnermut Naalakkersuisoqarfiup kujataani periarfissat misissorpaat

- Naalakkersuisut soqutigisaraat aalisartut aalisarnerminni unammillertuagaannut naalakkersuinikkut oqilisaaqataassallutik, Finn Karlsen oqarpoq

Aalisarnermut, piniarnermut nunalerinermullu naalakkersuisoq Finn Karlsen Siumumeersoq

- Aalisarnermut, piniarnermut nunalerinermullu Naalakkersuisoqarfiup maannakkut aqutsiveqarfik misissorpaa, avannamut Attup avannaatunginnguanit kujammut Nunarsuit angullugit killeqarfillip, naleqqussaavigineqarsinnaanersoq.

Inatsisartuni ilaasortap, Hans Aronsenip, paragraf 37 tunngavigalugu apeqqutaanut Aalisarnermut, Piniarnermut Nunalerinermullu Naalakkersuisoq, Finn Karlsen taama akissuteqarpoq, aqutsiveqarfiup pineqartup avannarpallatsinneqarsinnaaneranut Naalakkersuisut soqutigisaqarnersut apeqqutaanut.

- Sinerissamut qanittumi aalisartut atugaannik sapinngisamik pitsanngorsaaniarnermi naatsorsuutigineqarsinnaassaaq, aqutsiveqarfiup pineqartup killeqarfianik allanngortitsisoqassagaluarpat, tamaani pisassiissutinut tunngasut naalakkersuisoqarfiup misissuineranut aamma ilanngukkumaarmagit. Finn Karlsen oqarpoq.

Nungusaataanngitsumik aalisarneq
- Taamaaliortoqarsinnaalluni Naalakkersuisut tunaartaat , tassaasoq piujuaannartitsinermik tunngaveqarluni aalisarneq – ajorseriartinngikkaluarlugu, Finn Karlsen oqarpoq.

Naalakkersuisut ilisimaarilluarpaat sinerissamut qanittumi qaleralinniarnermi unammilligassarpassuaqarmat.

- Naammattunik tunitsivissaqannginneq aamma ungasissumi aalisartarnerit silallu allanngorarnera aamma unammilligassanut ilaalluinnarput.

-Naalakkersuisut soqutigisaraat aalisartut aalisarnerminni unammillertuagaannut naalakkersuinikkut oqilisaaqataassallutik, Finn Karlsen erseqqissaavoq.

Powered by Labrador CMS