Aalisarnermut Naalakkersuisoqarfiup KNAPK isornartorsiorpaa

Aalisarnermut, Piniarnermut Nunalerinermullu Naalakkersuisoqarfiup akuersaarsinnaanngilluinnarpaa KNAPK-imit Naalakkersuisoqarfik pillugu tusagassiortunik katersortitsinermi oqaatigineqartut. Naalakkersuisoqarfiup KNAPK politiilersuunniarlugu isumaliutigaa.

- Aalisarnermut, Piniarnermut Nunalerinermullu Naalakkersuisoqarfiup akuersaarsinnaanngilluinnarpaa KNAPK-ip Naalakkersuisoqarfimmi atorfilittanut, nunanit allaneersunut, pasilliinera. Kattuffik isumaqarpoq atorfilittat nunanit allaneersut nunaqqatitik salliutillugit pisassittaraat. Naalakkersuisoqarfiullu nunat allamiut aalisariutinik piginnittui ukioq manna avaleraasartoortassanik pisassiinermi salliutittaraat kalaallinit pigineqartut pingaarnerutinneqassanatik, Aalisarnermut, Piniarnermut Nunalerinermullu Naalakkersuisoqarfimmi pisortaq Jørgen Isak Olsen, tusagassiutinut nalunaarummi allappoq.

Uppernarsaatitaqanngitsunik oqalunneq
KNAPK-ip saqqummiussamini ilaatigut ima allappoq:

'Politikerit Inatsisartunullu ilaasortanngorumaartussat kiisalu minnerunngitsumik Naalakkersuisuutitaqalertussat ilisimaqqissaartariaqarpaat tupinnaannartumik Nunatta pingaarnertut inuussutissarsiutaata ingerlanniarneranut tunngatillugu Naalakkersuisoqarfik maannakkut kalaallinik naqisimanninniartunik nunami allamiunik aqunneqarmat.'

Aamma: 'Allaat uagut kalaaliusugut oqaatsigut atorlugit oqalussinnaatitaanata – illaruaatigineqartarlutalu pineqalernikuuvugut.'

KNAPK-lu erseqqissaalluni allappoq 'Naalakkersuisoqarfiup maannamut nunami allamiunut nunatsinnut attuumassuteqanngitsunut nunaqqatiminnut pisassiissutigisalermatigit – tamarmik taamaattut uppernarsaatissartaqarput'

Naalakkersuisut pisassiisartut
Naalakkersuisoqarfimmit erseqqissaassutigineqassaaq Naalakkersuisoqarfimmi atorfilittat nunatta imartaani avaleraasartoortassanik aalisakkanillu allanik pisassiineq ajormata.

- Naalakkersuisut nalunngeqatigiissusertik naapertorlugu aalisakkanik pisassanik aalajangiisarput. Aalisarnermut, Piniarnermut Nunalerinermullu Naalakkersuisoqarfiup atorfilittat nunanit allaneersut nunaqqatiminnut pisassinneqarnerartarlugit KNAPK-ip oqarnera eqqortuuserinngimmagu, Naalakkersuisoqarfiup kattuffik politiinut unnerluutigissallugu isumaliuutigivaa, Naalakkersuisoqarfimmi pisortaq, Jørgen Isak Olsen oqarpoq.

Sermitsiaq.AG-mit KNAPK oqaaseqartinniarlugu suliaqarpoq