Aalisarnermut inatsit pillugu paatsiveerunnersuaq: Kina eqqortumik oqarpa?
Inatsisartuni Siuliuttaasoqarfimmi siulittaasoq Hans Enoksen oqarpoq Naalakkersuisunit aalisarnermut inatsisissatut siunnersuummik, ukiaanerani ataatsimiittoqarnerani oqallisissiamik, tigusaqarsimanatik. Taamaasilluni Erik Jensen akerlilerneqarpoq
Hans Enoksen KNR-imut taama oqareernera aalisarnermut inatsisissaq pillugu suliassaq paatsiveerussutaanerulerpoq.
Tassami Sermitsiaq.AG-mut pingasunngormat oqaatigineqarpoq aalisarnermut inatsit pillugu Inatsisartut Siulittaasoqarfiat oqalliseqarsimasoq, amerlanerussuteqartullu isumaqartut siunnersuutip ukiaanerani ataatsimiinnermi oqallisigineqarnissaa itigartinneqassasoq.
Taamatut nalunaartoqarnera soqutiginarpoq, tassami Erik Jensen inuussutissarsiuteqartunut suliaqartut KNAPK aamma Sulisitsisut ataatsimeeqatigineranni oqarpoq siunnersuut ukiaanerani ataatsimiinnermi suliarineqassasoq.
Kina eqqortumik oqarpa?
Apeqqutaalerpoq kina eqqortumik oqarnersoq aamma kina tatigineqassava? Tassami Hans Enoksen oqarpoq Naalakkersuisunit tiguneqarsimanani, aappaatigut Erik Jensen oqartoq ukiaanerani ataatsimiinnermi siunnersuut suliarineqassasoq.
Aalisarnermut inatsisissatut siunnersuut taamatut oqallisigineqarsimasinnaanngikkaluarpoq Naalakkersuisut piffissaq eqqorlugu siunnersuut tunniussimasuuppassuk, siunnersuummi aggustip 24-ani nalunaaqutaq 12.00 tunniunneqareersimasussaagaluarpoq.
Siulittaasoqarfik
Sermitsiaq.AG-ip paasisai naapertorlugit, Naalakkersuisut Inatsisartut Siulittaasoqarfiannut saaffiginnissimavoq, tassani neriuutigineqarluni aalisarnermut inatsisissatut siunnersuut Inatsisartut ukiaanerani ataatsimiinneranni suliarineqarlunilu oqaluuserineqarnissaa. Siunnersuut Siulittaasoqarfimmut septembarip 21-ani nassiunneqassaaq - Inatsisartut ukiaanerani ataatsimiinnerat septembarip 28-ani ataatsimiinnerat ammarneqassaaq.
Aalisarnermut inatsisissap tusarniaassutigineqarsimannginnera pissutaalluni Inatsisartuni Siulittaasoqarfik siunnersuut pillugu ataatsimiipput aggustip naanerani. Aalisarnermut ataatsimiititaliaq tatineqartussaasoq Siulittaasoqarfik isumaqarpoq, tusarniaassutigineqarnikuunngilarmi.
Suliaq erloqinartoq
Pisoq Erik Jensenip tatiginassusaanut innarliisinnaavoq, isumaqarsimagaluarpormi siunnersuut Inatsisartuni Siulittaasoqarfimmit akuerisaaginnassasoq.
Naalakkersuisut Inatsisartuni Siulittaasoqarfimmi ilaasortaasunik parteeqatiminnik septembarip 28-at nallertinnagu inissiisinnaanerat apeqqutaaginnalissaaq. Ajornannginnerpaaq anguniarlugu Naalakkersuisut iliuuseqarsimasinnaagaluarput, tassami siunnersuut aggustip 24-ani nalunaaqutaq 12.00 sioqqullugu siunnersuut tunniussimasinnaagaluarpaat.