Friday, October 6, 2017 - 09:52

Aalisarnermut inatsit ima oqaaseqarfigineqarpoq

Aalisarnermut Piniarnermut Naalakkersuisoqarfimmut tusarniaanermi akissutit nassiunneqartut amerlapput. Tamanna ilaatigut aalisarnerup Nunatsinni inuussutissarsiutit pingaarnersaaneranik pissuteqarpoq. Tusarniaanermi akissuterpassuit ilaannit issuaanerit ilaat katersorpagut.

Grønlandsbanken
Siunnersuut ungasissoq eqqarsaatigalugu inuiaqatigiit aningaasaqarneranni iluaqutaasussamik Kalaallit Nunaannut sunniutissaqanngilaq, siunnersuummilu suliffeqarnermut sunniutissat pitsaasut qularnarput.

Akileraartarnermut Aqutsisoqarfik
Sinerissap qanittuani aalisarnermit soqutigisaqartut avataasiornermi pisassiissutit aningaasaqarneq eqqarsaatigalugu tigusinnaassaneraat, Akileraartarnermut Aqutsisoqarfiup ataatsimut paasinninnera naapertorlugu annertuumik qularnartoqarpoq. Tamanna pisariaqartumik aningaasaliissuteqarnissamut aningaasaatinut 

WWF
Inatsisissatut siunnersuummut oqaaseqaatini inatsisip Kalaallit Nunaata aningaasaqarneranut qanoq sunniuteqarsinnaanera annertuumik nalornissutigineqarnera atuarneqarsinnaammat, WWF-ip ernumassutigaa. Inatsisissatut siunnersuutip saqqummiunneqannginnerani allannguutit annertuut erseqqarilluinnartumik nassuiarneqartariaqarput.

Sulisitsisut
Naalakkersuisut piareersarneqarluanngitsumik aamma amigartumik inatsisissatut siunnersuummik kukkuluttorneqartumik saqqummiussipput. Inatsisissatut siunnersuut inatsimmik taama annertutigisumik aningaasaqarnermut inuiaqatigiinnullu annertuumik kinguneqartitsisussamut siunnersuuteqarnermut pitsaassusissamik piumasaqaatinut naammassinninngitsoq, Sulisitsisut isumaqarput.

Kommuneqarfik Sermersooq
Siunnersuut maanna iluseqarnermisut assigiinngitsorpassuarnik ernumanartoqartitsisoq, Kommuneqarfik Sermersooq isumaqarpoq, taakku siunnersuutip pitsaaqutissaanik qaangiinerujussuupput, siunnersuutip tunuartinneqarnissaa aamma apeqqutit akineqanngitsut ernumassutigineqartullu misissoqqissaarneqarlutik, nassuiarneqarlutik aamma aaqqiissutinik imaluunniit periarfissanik allanik suliaqartoqassasoq, Kommuneqarfik Sermersooq innersuussivoq.

Aningaasaqarnermut Akileraartarnermut Naalakkersuisoqarfik
- Siunnersuut maanna ilusaa naapertorlugu akuerineqassagaluaruni, AAN-ip (Aningaasaqarnermut Akileraartarnermut Naalakkersuisoqarfik, aaqq.) inuussutissarsiornermut aningaasaqarnikkut ajortumik sunniuteqarnissaa naatsorsuutigineqartariaqartoq isumaqarpoq. Tamanna Naalakkersuisut pingaarnertut politikkiata aningaasaqarnikkut namminiilivinnissamik suliniarnissamik angusaqarniarnerup aamma aningaasaqarnikkut politikkimik ataavartumik anguniagaqarnerup siunissami atugarissaarnermik qulakkeerisussap killormoortoraa.

Aamma atuaruk: Aningaasaqarnermut naalakkersuisoqarfiup aalisarnermut inatsit isornartorsiorpaa

Pinngortitamut Avatangiisinullu Naalakkersuisoqarfik
Oqaaseqaatit tulluarsarneqarnissaat naalakkersuisoqarfiup innersuutigaa, taamaalilluni piujuartitsilluni atuinissap pingaassusaa anguneqarniassammat, taamaaliornikkut ungasissoq eqqarsaatigalugu inuiaqatigiit aningaasaqarnikkut annerpaamik pissarsissutaanissaat ersarinnerussammat.

Transparency International Greenland
Inatsisissatut siunnersuut pipallataasoq takuneqarsinnaavoq. Aammattaaq assersuutigalugu atuarneqarsinnaavoq Kalaallit Nunaanni eqqartuussivik aalajangiisussasoq. Tamanna inatsisitigut aalajangerneqarsinnaanngilaq.

Seneste nyheder / Nutaarsiassat kingulliit