Aalisarnermut inatsit: Illuatungeriit saqitsaattut naapissapput

KNAPK-p aamma Sulisitsisut pingasunngornermi tusagassiortunik seminarertitsineranni saqqummiunneqarpoq, sapaatip-akunnerata tulliani sisamanngornermi tallimanngornermilu qinikkat seminarimut aggersaasimasut, tassani aalisarnermut inatsit nutaaq sammineqassalluni.

Peqataaniarlutik nalunaartorpassuit
26-t peqataaniarlutik nalunaareersimapput, ilaatigut aalisarnermut piniarnermut naalakkersuisoq, Karl-Kristian Kruse, aamma aningaasaqarnermut akileraartarnermullu naalakkersuisoq, Aqqaluaq B. Egede. Tamatuma saniatigut Inatsisartunut ilaasortat arlaqartut peqataaniarput. Peqataasut 40-t angussagaat neriuutigineqarpoq.

Soqutigisaqartut kattuffiit taakku marluk neriuutigaat, siunissami aalisarnerup ilusilersorneqarnera oqaloqatigiinnikkut pisinnaassasoq, tamanna tassanngaannaq 2016-imi marsimi unippoq.

Aalisarnermut inatsimmut nutaamut siunnersuut kattuffinnit soqutigisaqartunit marlunnit Henrik Lethimit, Sulisitsisut, Henrik Sandgreenimit, KNAPK, tusagassiortunik katersortitsinermi sakkortuumik isornartorsiorneqarpoq.

Taakku siulittaasut marluk, aalisarnerup ingerlalluarneranik ajoqusiisumik inatsimmik inaarinninnissamut aarlerisaarutertik oqaatigeqqippaat, tamanna nunap karsiata taamatullu inuiaqatigiit iluaqutigisaannut annertuumik kinguneqartitsisinnaavoq. Taakku marluullutik Siumumeersup Simon Olsenip oqaatigisimasaanut unnersuussipput, taamani 2004-mi aalisarnermut piniarnermut naalakkersuisup paasivaa, raajat piffissaligaanngitsumik pisassiissutigineqartarnerat peerneqarnissaat inuiaqatigiinnik soqutigisarisinnaanngikkaat, akisuallaarnissaa aamma sunniuteqarpianngitsumik aalisarnermik kinguneqassammat.

Nunani allani kalerriineq
Piffissaligaanngitsumik raajanik pisassiissutit atorunnaarsinneqassappata, siusinaarluni kalerriutiginnittoqartariaqarneranik nunanit allanit ilisimasanik aallartoqarsimasoq, Henrik Leth ilisimatitsivoq. Inatsisissatut siunnersuummi allaqqavoq, minnerpaamik ukiuni tallimani kalerriuteqartoqartassasoq.

- Norgemi minnerpaamik pinngitsaaliissummik pisoqassanngippat, minnerpaamik ukiuni 20-nik killeqartitaanissaa naqissuserneqarnikuuvoq. Danmarkimi atugassarititaasut ukiuni arfineq-pingasuniit 16-inut amerlineqarput, Savalimmiunilu ukiut 17-18-iupput, Henrik Leth oqarpoq, taanna aamma Polar Seafoodimi siulersuisuni siulittaasuuvoq, taanna inatsit nutaaq atuutilissappat eqqorneqartussaavoq.

Henrik Leth assigalugu Henrik Sandgreen aalisarnermut piniarnermut naalakkersuisoqarfimmit ammanerusoqarnissaanik ujartuivoq. Inatsisip suliarineqarnera sioqqullugu eqqartuussissusierisumit aamma Copenhagen Economicsimit suliarineqarsimasumut nalunaarusianut takunnissinnaatitaannginnertik paasisinnaanngilaat.

- Nalunaarusianik allagaatinik takunnikkumanernut itigartitaavugut. Inatsimmut taama pingaaruteqartigisumut paasissutissat aamma kingunissaasut sooq toqqorterneqarniarnersut paasisinnaanngilluinnarpara, Henrik Leth oqarpoq.

Oqaloqatigiinneq suleqatigiinnerlu
Siulersuisunut siulittaasut marluk neriuutigaat, inatsissatut siunnersuut annertuumik allanngortinneqassasoq, aamma inatsimmik nutaamik suliaqarnermi ilanngunneqarnissaq, inuiaqatigiinnullu annertuumik kinguneqartinneqannginnissaa, tamanna soorlu inatsisissatut siunnersuummut oqaaseqaatini allaqqasoq.

Kingunissai
Oqaaseqaatini ilaatigut makku naqissuserneqarput:

• Akileraarutitigut isertitakinnerulerneq
• Sulisut ikinnerulernerat
• Aalisarneq aalajaannginnerusoq