kukkuneq
Aalisarnermut inatsisissatut siunnersuut kukkuneqarpoq
Aalisarnermut inatsissatut siunnersuummi paragraffi pingaarutilik kukkusumik nassuiaaserneqarsimavoq. Naqqiutigineqartoq ullumi nassiunneqarpoq – tusarniaanermullu piffissaliunneqarsimasoq sivitsorneqarluni
Aalisarnermut inatsisissatut siunnersuut sapaatit-akunnerini kingullerni sakkortuumik oqallisigineqarpoq. Siunnersuullu kukkuneqartoq, massakkut paasinarsivoq.
Paragraffillu kukkussutigineqarsimasut tassaapput, aalisarneq nunaqavissunit ingerlanneqarnissaanik qulakkeerinnittussat.
Ingerlatsiviit pillugit anguniangaavoq, inuussutissarsiutingalugu aalisarnermik ingerlataqartut akorngini Nunatsinni najugaqavissut minnerpaamik 2/3-imik piginneqataanissamik minnerpaaffiliineq.
Raajarniallu pineqartillugit tamakkiisumik nunaqavissut akorngini pigineqassapput. Naggataanilu taamatut ilassuteqarneq, inatsisissatut siunnersuutip 14. augustimiilli tusarniaavigineqartumut ilanngutinngitsoorsimavaa.
Pineqartorlu tassaavoq siunnersuummi § 3, imm imm. 3, nr.2, massakkut ima oqaasertaqalertussaq: 'suliffeqarfimmi piginneqataassutinut aningaasaliissutit 2/3-ii taasisinnaatitaanerup assigisaaluunniit assinga aqqutigalugu
sunniuteqarsinnaasumik inunnit ataasiakkaanit imm. 2, nr. 1-3- ni piumasaqaatinik naammassinnissimasunit toqqaannartumik
toqqaannanngitsumilluunniit pigineqassapput'.
Siunnersuummut naqqiut ullumi nassiunneqarsimavoq. Kukkunerullu kinguneraa, siunnersuutip tusarniaavigineqarneranut killigitinneqartoq, ulluni sisamani, sivitsorlugu 18. septemberimiit 22. septemberip tugaanut ingerlanneqartussanngornera.