Finanslov

Aalisarnermik inuussutissarsiortut 2017-imi 288 millionit koruuninik akiliuteqassapput

Naalakkersuisut nutaatut saarulliit aamma suluppaakkat akitsuusersorneqarnissaat siunnersuutigaat

Aalisakkat qaleruallillu assigiinngitsut tunineqartartut Naalakkersuisut suli akitsuusersorusuppaat.

Uani sapaatip-akunnerani aningaasaqarnermut naalakkersuisup, Randi Vestergaard Evaldsenip (D), 2017-imut aninigaasanut inatsisissatut siunnersuummi saqqummiussaani tamanna takuneqarsinnaavoq.

Aalisakkat tamarmik
Naalakkersuisut aalisakkat tamaasa siornatigutut akitsuusersorneqarnissaat kissaatigaat - sinerissap qanittuaniittut avataaniittulluunniit apeqqutaatinnagit.

Saarulliit aamma suluppaakkat aalisarneqarnerat nutaatut aamma akitsuuteqalissaaq, kullerit aamma saarulliit arlaat, taamatullu aamma artit allat aalisarneqarnernnit isertitat annertusinissaat siunertarineqarpoq.

288 millionit
Aalisarnermut tunngatillugu aningaasanut inatsisissatut siunnersuut naapertorlugu akitsuutit 288 millionit koruuniupput - pisassiissutit tamarmik aalisarneqarnissaat naatsorsuutigalugu. Akitsuutillu imatut agguataarneqarput:

  • Raajanut akitsuutit 175 millionit koruunit, tamanna 2016-imisut ippoq
  • Qaleralinnut akitsuutit 40 millionit koruunit, tamanna aamma 2016-itut iinnarpoq
  • Aalisakkanut ikerinnaasiortunik taaneqartartunut, soorlu avaleraasartuunut allanullu akitsuutit 73 millionit koruuniussapput. Avaleraasartuuginnarnut akitsuutit 49 millionit koruuniupput, ukioq manna aamma taamaapput. Aalisarnermullu akitsuutit amerlinerat saarullinnik suluppaakkanillu akitsuusersuilernermik pissuteqarpoq.

Akitsuusersueriaaseq nutaaq
Naalakkersuisut aamma 2016-imi nutaamik aalisakkanut tamanut akitsuuserueriaaseqalernissaanik naatsorsuuteqarput, tamannalu aalisarnermik inuussutissarsiortut allallu soqutigisaqartut oqaloqatiginerisut pissaaq.

Akitsuutit nutaat pilerssaarutit malillugit 2017-imit atuutilissapput.

Aningaasanut inatsisissatut siunnersuut pillugu allaaserisat kingulliit atuakkit:

Aningaasanut inatsisissatut siunnersuut ukiuni tallimani aatsaat sinneqartoortoq

Aningaasanut inatsisissaq: IA isumaginninnermut aningaasanik amerlanerusunik qulakkeerinninniarpoq

Suliffeqarfiit akileraarutaat Naalakkersuisut apparujussuarnissaat kissaatigaat

Powered by Labrador CMS