Aalisarneq

Aalisarnermi kinguariarneq - aalisarnerli ingerlaqqippoq

Raajanik, qaleralinnik aamma saarullinnik aalisarneq ukiormanna kvartalimi siullermi piffissamut tassunga 2016-imut sanilliullugu kinguariangaatsiarfiuvoq. Aalisarluartoqarneratali taamaatinneranik pissuteqanngilaq.

Trawler
Kilisaat raajarniut uani malissiortoq takuneqarsinnaavoq.

Taakkunannga aalisarnerup kinguariarnera silamik pissuteqarpoq, ukiormanna imarsiortunut tamanna artorsartitsisimavoq.

- Raajarniarneq qiviaraanni, sumiiffinni arlalinni sikuuvoq, tunisassiorfigullu matusariaqartarsimavagut. Tassa taamatut nassuiaatissartaqarpoq, Polar Seafoodimi siulersuisuni siulittaasoq, Henrik Leth nassuiaavoq.

Pisassiissutigineqartut aalisarneqarnissaannut ajornartorsiortoqarnavianngitsoq taanna ilisimatitsivoq, naak ukiup sisamararterutaa tamakkiisumik ingerlatsiffiunngikkaluartoq.

Ima annertutigisumik aalisartoqarpoq
Kvartalimi siullermi ima aalisartigisoqarpoq. Ungaluutilinni 2016-imit kisitsisit. Kisitsisit Naatsorsueqqissaartarfimmeerput.

  • Raajat – 6.203 tons - (9.461)
  • Qalerallit – 5.201 tons – (6.636)
  • Saarulliit – 2.090 tons – (3.739)
Powered by Labrador CMS