Aalisarneq pillugu politikkikkut siammasissumik isumaqatigiissuteqarneq

Ullumi arfininngornermi novembarip 15-ianni 2014 aalisartut ulluata nalliussineqarnerani Inuit Ataqatigiit erseqqissarusuppaat aalisarneq aalisartullu ataatsimut inuiaqatigiitsinnut pingaaruteqartut, partii tusagassiorfinnut nalunaarutikkut allappoq.

– Aalisarnermi politikkikkut siammasissumik isumaqatigiissuteqarusuppugurt, Ane Hansen, IA, siusinnerusukkut aalisarnermut Naalakkersuisuusimasoq tusagassiorfinnut nalunaarutikkut allappoq.

– Piffissanngorput aalisarnermut inatsisip naammassillugu suliarinissaanut. Ataatsimoorluta taamaasiussaagut, aalisarneq suli ineriartortinniarlugu nutaanngorsarniarlugulu. Avammut tuniniaanermi nunami inuussutissarsiutit pingaarnersaat siunissamut qulakkeerneqassaaq. Inuussutissarsiut inuiaqatigiitsinnut pingaarutilerujussuuvoq, immap pisuussutai ataatsimut pigisaammata. Inuit Ataqatigiit qularutiginngilaat aalisarneq aalajaatsumik ineriartortinneqassappat pisariaqartoq aalisarnermut politikki uppernartoq, aalajaatsoq toqqissisimanartorlu, Ane Hansen oqarpoq, taassumalu aalisarnermut inatsisip naammassillugu suliarinissaanut partiit allat tamaasa suleqatiserai.

– Aalisarnermi aningaasarsiornerup pitsaanerulersinnissaa qulakkeerniarlugu sulissutigigatsigu aamma aalisakkanik tunisassiat niuerutivut, pitsaassusaat qaffassassavagut, taanna naliliivoq.

– Akisussaassusilimmik aalisartariaqarpugut aammalu aalisartut Pinngortitalerullu inassuteqaatai ataqqillugit, taamaasilluta qulakkiissagatsigu nungusaataanngitsumik aalisarneq, silap pissusiata allanngortiartornerata pisuussutinut sunniutai eqqarsaatigalugit, ataatsimut pisuussutivut pingaarutillit aalisapilunneqaqqunagit. Akisussaassusilimmik aalisartoqassaaq, kinguaassavut aamma naammattunik pissaqarniassammata. Tamanna peqatigalugu aki pitsaanerusoq pissarsiarissavarput qulakkeerlugulu nungusaataanngitsumik aalisarneq, soorluttaaq assersuutigalugu MSC-mik meqqit annertunerusumik atulerlutigit, Ane Hansen oqarpoq.

Inuit Ataqatigiit qineqqusaarutigaat aalisagaq tamaat atorneqartassasoq aalisakkallu ilaanik eqqaasarneq annikillineqassasoq. Tamatumunnga pisariaqarpoq aalisarnermi nutaaliorneq aalisakkallu tamakkiisumik atorneqarnissaa, partii tusagassiorfinnut nalunaarutikkut tikkuaavoq.

IA-p tulaassinissamik pisussaaffik attatiinnarusuppaa, nunami sulisartut suliffimmik attatiinnarnissaannut toqqissisimaqqullugit. Partiip qaammammukkaartumik pisassiisarnissaq tapersersorpaa, umiatsiaararsortunullu ataasiakkaanut tunineqarsinnaanngitsunik pisassiisalernissaq oqaloqatigiissutigerusullugu. Raajartassanut piginnittuunerit siammarsarusuppavut. Kinguaariit nikinnissaat ajornannginnerulersinneqassaaq pisassanullu pissamaateqarfimmik pilersitsisoqassaaq, IA tusagassiorfinnut nalunaarummi allappoq. Tamatuma saniatigut partiip sulissutiginiarpaa aalisartunut piniartunullu ilinniagaqarnermi periarfissat pitsaanerusut, kiisalu qulakkeerniarlugu aalisartut piniartull soraarnerussutisiaqalernissamut ileqqaarsinnaanissaat.

Inuit Ataqatigiit kajumissaarutigaat aalisartut ulluata nalliussineqarnissaa, kikkullu tamarmik aalisarnermik piniarnermillu inuussutissarsiuteqarneq tapersersussagaat, inuussutissarsiut ikiorlugu nioqqutissanik kalaallit tunisassiaannik pisisarnikkut, taamaasillunilu annertunerusumik imminut pilersorneq qulakkeerlugu. Tamanna avatangiisinut, aammalu inunnut ataasiakkaanut aningaasaqarnitsinnullu peqqinnartuussaaq, Ane Hansen isumaqarpoq, taassumalu apeqqutit tamakku partiinik allanik kattuffinnillu oqaloqatigiissutiginissaat qilanaaraa. Ataatsimoorluta aaqqiissutissanik pitsaasunik ataavartunillu nassaarsinnaavugut, taanna oqarpoq.